Job Description: ➤ ಭಾರತದ ಗಡಿ ಪ್ರದೇಶಗಳಲ್ಲಿ ಹೆಚ್ಚುತ್ತಿರುವ ಅಕ್ರಮ ಒಳನುಸುಳುವಿಕೆ ಹಾಗೂ ಇತರೆ ಅಸ್ವಾಭಾವಿಕ ಕಾರಣಗಳಿಂದ ಉಂಟಾಗುತ್ತಿರುವ ಜನಸಂಖ್ಯಾ ಏರಿಳಿತಗಳ (Demographic Shifts) ಬಗ್ಗೆ ಆಳವಾದ ಅಧ್ಯಯನ ನಡೆಸಲು ಕೇಂದ್ರ ಸರ್ಕಾರವು ಒಂದು ಮಹತ್ವದ ಹೆಜ್ಜೆಯನ್ನಿಟ್ಟಿದೆ. ಸುಪ್ರೀಂ ಕೋರ್ಟ್‌ನ ನಿವೃತ್ತ ನ್ಯಾಯಮೂರ್ತಿ ಪ್ರಕಾಶ್ ಪ್ರಭಾಕರ್ ನಾವಲೇಕರ್ ಅವರ ಅಧ್ಯಕ್ಷತೆಯಲ್ಲಿ ಕೇಂದ್ರ ಗೃಹ ಸಚಿವಾಲಯವು (MHA) ಉನ್ನತ ಮಟ್ಟದ ಸಮಿತಿಯೊಂದನ್ನು (High-Level Committee on Demographic Changes - HLCDC) ಅಧಿಕೃತವಾಗಿ ರಚಿಸಿದೆ.➤ ಪ್ರಧಾನಿ ನರೇಂದ್ರ ಮೋದಿ ಅವರು 2025ರ ಆಗಸ್ಟ್ 15ರಂದು 79ನೇ ಸ್ವಾತಂತ್ರ್ಯ ದಿನಾಚರಣೆಯ ಕೆಂಪುಕೋಟೆಯ ಭಾಷಣದಲ್ಲಿ ದೇಶದ ಭದ್ರತೆಗೆ ಸವಾಲಾಗಿರುವ ಜನಸಂಖ್ಯಾ ಬದಲಾವಣೆಗಳ ಕುರಿತು ‘ಜನಸಂಖ್ಯಾ ಮಿಷನ್’ (Demographic Mission) ಅಥವಾ ಉನ್ನತ ಮಟ್ಟದ ಸಮಿತಿ ರಚಿಸುವುದಾಗಿ ಪ್ರಕಟಿಸಿದ್ದರು. ಈಗ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ತಮ್ಮ ಅಧಿಕೃತ ‘ಎಕ್ಸ್’ (ಟ್ವಿಟರ್) ಖಾತೆಯ ಮೂಲಕ ಈ ಸಮಿತಿಯ ಜಾರಿಯನ್ನು ಅಧಿಕೃತವಾಗಿ ಘೋಷಿಸಿದ್ದಾರೆ.➤ ಸಮಿತಿಯ ರಚನೆ ಮತ್ತು ಪ್ರಮುಖ ಸದಸ್ಯರು: ಈ ಉನ್ನತ ಮಟ್ಟದ ಸಮಿತಿಯು ದೇಶದ ಅತ್ಯುನ್ನತ ತಜ್ಞರನ್ನು ಒಳಗೊಂಡಿದ್ದು, ಅತ್ಯಂತ ವ್ಯವಸ್ಥಿತವಾಗಿ ಕಾರ್ಯನಿರ್ವಹಿಸಲಿದೆ:ಅಧ್ಯಕ್ಷರು: ನ್ಯಾಯಮೂರ್ತಿ (ನಿವೃತ್ತ) ಪ್ರಕಾಶ್ ಪ್ರಭಾಕರ್ ನಾವಲೇಕರ್.ಪ್ರಮುಖ ಸದಸ್ಯರು: 1. ದುರ್ಗಾ ಶಂಕರ್ ಮಿಶ್ರಾ (ನಿವೃತ್ತ IAS ಅಧಿಕಾರಿ ಹಾಗೂ ಜನಗಣತಿ ಆಯುಕ್ತರು)2. ಬಾಲಾಜಿ ಶ್ರೀವಾಸ್ತವ (ನಿವೃತ್ತ IPS ಅಧಿಕಾರಿ)3. ಡಾ. ಶಾಮಿಕಾ ರವಿ (ಖ್ಯಾತ ಅರ್ಥಶಾಸ್ತ್ರಜ್ಞರು ಹಾಗೂ ಪ್ರಧಾನಿಯವರ ಆರ್ಥಿಕ ಸಲಹಾ ಮಂಡಳಿಯ ಸದಸ್ಯರು)ಸದಸ್ಯ ಕಾರ್ಯದರ್ಶಿ: ಕೇಂದ್ರ ಗೃಹ ಸಚಿವಾಲಯದ ಜಂಟಿ ಕಾರ್ಯದರ್ಶಿ (ವಿದೇಶಿಯರ ವಿಭಾಗ-1).➤ ಸಮಿತಿಯ ಪ್ರಮುಖ ಉದ್ದೇಶಗಳು ಮತ್ತು ಕಾರ್ಯಭಾರಗಳು: ಸಮಗ್ರ ಅಧ್ಯಯನ: ದೇಶದ ಗಡಿ ಜಿಲ್ಲೆಗಳು, ಬುಡಕಟ್ಟು ಪ್ರದೇಶ ಹಾಗೂ ಪ್ರಮುಖ ನಗರಗಳಲ್ಲಿ ಅಕ್ರಮ ವಲಸೆಯಿಂದ ಆಗುತ್ತಿರುವ ಅಸಹಜ ಜನಸಂಖ್ಯಾ ಬದಲಾವಣೆಗಳ ಬಗ್ಗೆ ವೈಜ್ಞಾನಿಕ ಸಂಶೋಧನೆ ನಡೆಸುವುದು. ಮಾದರಿ ವಿಶ್ಲೇಷಣೆ: ಧಾರ್ಮಿಕ ಮತ್ತು ಸಾಮಾಜಿಕ ಸಮುದಾಯಗಳ ಮಟ್ಟದಲ್ಲಿ ಕಂಡುಬರುತ್ತಿರುವ ಅಸ್ವಾಭಾವಿಕ ಏರಿಳಿತಗಳು ಹಾಗೂ ಯೋಜಿತ ವಲಸೆಯ ಸ್ವರೂಪವನ್ನು ಸೂಕ್ಷ್ಮವಾಗಿ ಪರಿಶೀಲಿಸುವುದು. ಭದ್ರತೆ ಮತ್ತು ಸಂರಕ್ಷಣೆ: ಅಕ್ರಮ ವಲಸೆಯಿಂದ ದೇಶದ ಸಾರ್ವಭೌಮತ್ವ, ಆಂತರಿಕ ಭದ್ರತೆ ಮತ್ತು ಮೂಲ ಬುಡಕಟ್ಟು ಜನಾಂಗದ ಸಾಂಸ್ಕೃತಿಕ ಅಸ್ಮಿತೆಗೆ ಉಂಟಾಗುತ್ತಿರುವ ಧಕ್ಕೆಯನ್ನು ಮೌಲ್ಯಮಾಪನ ಮಾಡುವುದು. ಗಡೀಪಾರು ಕಾರ್ಯವಿಧಾನ: ಅಕ್ರಮ ವಲಸಿಗರನ್ನು ಕಾನೂನುಬದ್ಧವಾಗಿ ಗುರುತಿಸಲು, ಬಂಧಿಸಲು ಮತ್ತು ಗಡೀಪಾರು ಮಾಡಲು ಒಂದು ಶಾಶ್ವತ ಹಾಗೂ ಸುವ್ಯವಸ್ಥಿತ ಕಾರ್ಯಾಚರಣಾ ಚೌಕಟ್ಟನ್ನು ರೂಪಿಸುವುದು. ನೀತಿ ನಿರೂಪಣೆ: ಅಕ್ರಮ ವಲಸೆ ತಡೆಗಟ್ಟಲು ಮತ್ತು ಜನಸಂಖ್ಯಾ ಅಸಮತೋಲನ ನಿಯಂತ್ರಿಸಲು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ನಡುವೆ ಹೆಚ್ಚಿನ ಸಮನ್ವಯತೆ ಮೂಡಿಸುವ ನೀತಿಯನ್ನು ಶಿಫಾರಸು ಮಾಡುವುದು. ➤ ಗೃಹ ಸಚಿವ ಅಮಿತ್ ಶಾ ಅವರ ಹೇಳಿಕೆ: "ಅಕ್ರಮ ಒಳನುಸುಳುವಿಕೆ ಮತ್ತು ಇತರೆ ಕಾರಣಗಳಿಂದಾಗಿ ಜನಸಂಖ್ಯೆಯಲ್ಲಿ ಅಸ್ವಾಭಾವಿಕ ಬದಲಾವಣೆ ಕಂಡುಬರುತ್ತಿದೆ. ಇದು ಯಾವುದೇ ದೇಶದ ವರ್ತಮಾನ ಮತ್ತು ಭವಿಷ್ಯಕ್ಕೆ ದೊಡ್ಡ ಸವಾಲಾಗಿದೆ. ಈ ಗಂಭೀರ ಸಮಸ್ಯೆಯು ನಮ್ಮ ಸಾರ್ವಭೌಮತ್ವ, ರಾಷ್ಟ್ರೀಯ ಭದ್ರತೆ, ಕಾನೂನು ಸುವ್ಯವಸ್ಥೆ ಮತ್ತು ಬುಡಕಟ್ಟು ಸಮಾಜದ ಉಳಿವಿನ ಮೇಲೂ ನೇರವಾಗಿ ಪರಿಣಾಮ ಬೀರುತ್ತದೆ. ಇದನ್ನು ಎದುರಿಸುವ ಸಲುವಾಗಿ ಪ್ರಧಾನಿ ನರೇಂದ್ರ ಮೋದಿ ಅವರು ಘೋಷಿಸಿದ್ದ ಸಮಿತಿಯನ್ನು ಈಗ ರಚಿಸಲಾಗಿದೆ. ಈ ಸಮಿತಿಯು ನಿರ್ದಿಷ್ಟ ಕಾಲಮಿತಿಯೊಳಗೆ ಯೋಜಿತ ಪರಿಹಾರಗಳನ್ನು ಶಿಫಾರಸು ಮಾಡಲಿದೆ."
