Job Description: ➤ ಭಾರತೀಯ ಆರ್ಥಿಕತೆ ಮತ್ತು ಅಂತರರಾಷ್ಟ್ರೀಯ ವಿದ್ಯಮಾನಗಳ ದೃಷ್ಟಿಯಿಂದ ಜುಲೈ 15, 2026ಒಂದು ಐತಿಹಾಸಿಕ ದಿನ. ಭಾರತ ಮತ್ತು ಯುನೈಟೆಡ್ ಕಿಂಗ್‌ಡಮ್ (ಬ್ರಿಟನ್) ನಡುವಿನ ಮಹತ್ವಾಕಾಂಕ್ಷೆಯ ಸಮಗ್ರ ಆರ್ಥಿಕ ಮತ್ತು ವ್ಯಾಪಾರ ಒಪ್ಪಂದ (CETA - Comprehensive Economic and Trade Agreement) ಅಧಿಕೃತವಾಗಿ ಇಂದಿನಿಂದ ಜಾರಿಗೆ ಬಂದಿದೆ.➤ ಮುಕ್ತ ವ್ಯಾಪಾರ ಒಪ್ಪಂದ : ಯಾವುದೇ ಎರಡು ಅಥವಾ ಅದಕ್ಕಿಂತ ಹೆಚ್ಚು ದೇಶಗಳು ತಮ್ಮ ನಡುವಿನ ಆಮದು ಮತ್ತು ರಫ್ತು ಸರಕುಗಳ ಮೇಲಿನ ಸುಂಕಗಳು , ಕೋಟಾಗಳು ಮತ್ತು ಇತರ ವ್ಯಾಪಾರ ಅಡೆತಡೆಗಳನ್ನು ಕಡಿಮೆ ಮಾಡಲು ಅಥವಾ ಸಂಪೂರ್ಣವಾಗಿ ತೆಗೆದುಹಾಕಲು ಮಾಡಿಕೊಳ್ಳುವ ಒಪ್ಪಂದವೇ ಮುಕ್ತ ವ್ಯಾಪಾರ ಒಪ್ಪಂದ.➤ ಭಾರತದ ಶೇ 99ರಷ್ಟು ಸರಕುಗಳಿಗೆ ಸುಂಕರಹಿತ ಮಾರುಕಟ್ಟೆ ಪ್ರವೇಶ ಸಿಗಲಿದ್ದು, ಜವಳಿ, ಚರ್ಮೋದ್ಯಮದಂತಹ ಉದ್ಯೋಗ ಆಧಾರಿತ ವಲಯಗಳಿಗೆ ಉತ್ತೇಜನ ಹಾಗೂ ಐಟಿ ಕಂಪನಿಗಳ ನೌಕರರಿಗೆ 5 ವರ್ಷಗಳವರೆಗೆ ಸಾಮಾಜಿಕ ಭದ್ರತಾ ಕೊಡುಗೆಯಿಂದ ವಿನಾಯಿತಿ ಲಭ್ಯವಾಗಲಿದೆ.➤ ಈ ಒಪ್ಪಂದದ ಅಡಿಯಲ್ಲಿ ಬ್ರಿಟನ್‌ನ ಪೆಟ್ರೋಲ್/ಡೀಸೆಲ್ ಕಾರುಗಳ ಮೇಲಿನ ಆಮದು ಸುಂಕವನ್ನು ಶೇ 110 ರಿಂದ ಶೇ 10 ಕ್ಕೆ ಇಳಿಸಲು ಭಾರತ ಒಪ್ಪಿದ್ದು, ದೇಶೀಯ ಮಾರುಕಟ್ಟೆಯ ರಕ್ಷಣೆಗಾಗಿ ಬ್ರಿಟನ್ ಇವಿ ವಾಹನಗಳಿಗೆ 6ನೇ ವರ್ಷದಿಂದ ಸುಂಕ ವಿನಾಯಿತಿ ಸಿಗಲಿದೆ ಹಾಗೂ ಭಾರತೀಯ ಇವಿ ಕಾರುಗಳಿಗೆ ಬ್ರಿಟನ್‌ನಲ್ಲಿ ಆರಂಭದಿಂದಲೇ ಕೋಟಾ ಮಿತಿಯಲ್ಲಿ ಸುಂಕ ವಿನಾಯಿತಿ ಲಭ್ಯವಾಗಲಿದೆ.➤ ಬ್ರಿಟನ್‌ನಿಂದ ಬರುವ ಪ್ರೀಮಿಯಂ ಮದ್ಯಗಳ ಮೇಲಿನ ಆಮದು ಸುಂಕ ಕಡಿಮೆಯಾಗಲಿದೆ. ವಿಶೇಷವಾಗಿ ಪ್ರಸಿದ್ಧ ಸ್ಕಾಚ್ ವಿಸ್ಕಿ ಮೇಲಿನ ಆಮದು ಸುಂಕವು ಪ್ರಸ್ತುತ ಇರುವ ಶೇ 150 ರಿಂದ ತಕ್ಷಣವೇ ಶೇ 75 ಕ್ಕೆ ಇಳಿಯಲಿದ್ದು, 10 ವರ್ಷಗಳ ಅವಧಿಯಲ್ಲಿ ಇದು ಶೇ 40 ಕ್ಕೆ ಇಳಿಕೆಯಾಗಲಿದೆ.➤ ಭಾರತದ ಸೂಕ್ಷ್ಮ ವಲಯಗಳಿಗೆ ಸಿಕ್ಕ ರಕ್ಷಣೆ: ಭಾರತವು ತನ್ನ ದೇಶೀಯ ರೈತರು ಮತ್ತು ಉದ್ದಿಮೆಗಳನ್ನು ರಕ್ಷಿಸಲು ಕೆಲವು ಪ್ರಮುಖ ಉತ್ಪನ್ನಗಳನ್ನು ಈ ಸುಂಕ ವಿನಾಯಿತಿಯಿಂದ ಹೊರಗಿಟ್ಟಿದೆ: ತಾಜಾ ಸೇಬು, ವಾಲ್ನಟ್, ಧಾನ್ಯಗಳು, ಸಿರಿಧಾನ್ಯಗಳು, ಡೈರಿ ಉತ್ಪನ್ನಗಳು ಮತ್ತು ಖಾದ್ಯ ತೈಲಗಳು. ಇದರೊಂದಿಗೆ ಚಿನ್ನದ ಗಟ್ಟಿ ಮತ್ತು ಸ್ಮಾರ್ಟ್‌ಫೋನ್‌ಗಳಿಗೆ ಯಾವುದೇ ಸುಂಕ ವಿನಾಯಿತಿ ನೀಡಿಲ್ಲ. ➤ ಕರ್ನಾಟಕ ರಾಜ್ಯಕ್ಕಾಗುವ ಆರ್ಥಿಕ ಲಾಭಗಳು: ಚಿಕ್ಕಮಗಳೂರಿನ ಕಾಫಿ ಮತ್ತು ಕೊಡಗಿನ ಸಂಬಾರ ಪದಾರ್ಥಗಳು ಬ್ರಿಟನ್ ಮಾರುಕಟ್ಟೆಗೆ ಸುಂಕರಹಿತವಾಗಿ ಪ್ರವೇಶಿಸಲಿವೆ. ಬ್ಯಾಡಗಿ ಮೆಣಸಿನಕಾಯಿ, ಇಂಡಿ ನಿಂಬೆಹಣ್ಣು, ಮತ್ತು ಮೈಸೂರು ರೇಷ್ಮೆಗೆ ಹೆಚ್ಚಿನ ರಫ್ತು ಅವಕಾಶ ಲಭ್ಯವಾಗಲಿದೆ. ಕರಾವಳಿಯ ಸೀಗಡಿ ಮತ್ತು ಸಾಗರ ಉತ್ಪನ್ನಗಳಿಗೆ ಭಾರಿ ಬೇಡಿಕೆ ಬರಲಿದೆ. ಇದರೊಂದಿಗೆ ಧಾರವಾಡದ ಪ್ರಸಿದ್ಧ ಧಾರವಾಡ ಪೇಡಾ, ರಾಜ್ಯದ ಎಣ್ಣೆಕಾಳುಗಳು, ಏಲಕ್ಕಿ, ಸಿರಿಧಾನ್ಯಗಳು, ಗೋಡಂಬಿ, ಮಾವು ಮತ್ತು ತೆಂಗಿನಕಾಯಿ ಉತ್ಪನ್ನಗಳೂ ಸುಂಕವಿಲ್ಲದೆ ಬ್ರಿಟನ್ ಮಾರುಕಟ್ಟೆ ತಲುಪಲಿವೆ.
