➤ದೇಶದ ಅತ್ಯಂತ ಶ್ರೀಮಂತ ಕ್ರೀಡಾ ಸಂಸ್ಥೆಯಾದ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (BCCI) ಮಾಹಿತಿ ಹಕ್ಕು ಕಾಯ್ದೆ (RTI - Right to Information Act, 2005) ಅಡಿಗೆ ಬರುವುದಿಲ್ಲ ಎಂದು ಕೇಂದ್ರ ಮಾಹಿತಿ ಆಯೋಗ (CIC - Central Information Commission) ಐತಿಹಾಸಿಕ ತೀರ್ಪು ನೀಡಿದೆ.
 ಮೇ 18, 2026 ರಂದು ಕೇಂದ್ರ ಮಾಹಿತಿ ಆಯುಕ್ತರಾದ ಪಿ. ಆರ್. ರಮೇಶ್ಅವರು ಈ ಆದೇಶವನ್ನು ಹೊರಡಿಸಿದ್ದು, 2018 ರಲ್ಲಿದ್ದ ಹಳೆಯ ಆದೇಶವನ್ನು ಬದಲಾಯಿಸಿದ್ದಾರೆ. 
➤2018 ರಲ್ಲಿ ಅಂದಿನ ಮಾಹಿತಿ ಆಯುಕ್ತರಾಗಿದ್ದ ಎಂ. ಶ್ರೀಧರ್ ಆಚಾರ್ಯುಲು ಅವರು, ಬಿಸಿಸಿಐ ಒಂದು ಸಾರ್ವಜನಿಕ ಸಂಸ್ಥೆಯಾಗಿದ್ದು, ಆರ್‌ಟಿಐ ವ್ಯಾಪ್ತಿಗೆ ಒಳಪಡುತ್ತದೆ ಎಂದು ಆದೇಶಿಸಿದ್ದರು. ಆದರೆ, ಇದನ್ನು ಬಿಸಿಸಿಐ ಮದ್ರಾಸ್ ಹೈಕೋರ್ಟ್‌ನಲ್ಲಿ ಪ್ರಶ್ನಿಸಿತ್ತು. ಸೆಪ್ಟೆಂಬರ್ 2025 ರಲ್ಲಿ ಮದ್ರಾಸ್ ಹೈಕೋರ್ಟ್ ಈ ಪ್ರಕರಣವನ್ನು ಮರುಪರಿಶೀಲಿಸುವಂತೆ ಸಿಐಸಿಗೆ ಸೂಚಿಸಿತ್ತು. ಈಗ ಸುಪ್ರೀಂ ಕೋರ್ಟ್‌ನ ಹಳೆಯ ತೀರ್ಪುಗಳನ್ನು ಆಧರಿಸಿ ಸಿಐಸಿ ಬಿಸಿಸಿಐ ಪರವಾಗಿ ಹೊಸ ಆದೇಶ ನೀಡಿದೆ.
➤ಬಿಸಿಸಿಐ ಆರ್‌ಟಿಐ ವ್ಯಾಪ್ತಿಗೆ ಬಾರದಿರಲು ಪ್ರಮುಖ ಕಾರಣ: ಮಾಹಿತಿ ಹಕ್ಕು ಕಾಯ್ದೆಯ ಸೆಕ್ಷನ್ 2(h) ಪ್ರಕಾರ, ಒಂದು ಸಂಸ್ಥೆಯನ್ನು 'ಸಾರ್ವಜನಿಕ ಪ್ರಾಧಿಕಾರ' (Public Authority) ಎಂದು ಕರೆಯಬೇಕಾದರೆ ಅದು ಸರ್ಕಾರದ ನಿಯಂತ್ರಣ ಅಥವಾ ಧನಸಹಾಯ ಹೊಂದಿರಬೇಕು. ಆದರೆ ಬಿಸಿಸಿಐ ಈ ಕೆಳಗಿನ ಕಾರಣಗಳಿಂದಾಗಿ ಆ ವ್ಯಾಪ್ತಿಗೆ ಬರುವುದಿಲ್ಲ ಎಂದು ಸಿಐಸಿ ಸ್ಪಷ್ಟಪಡಿಸಿದೆ:
- ಸ್ವಾಯತ್ತ ಖಾಸಗಿ ಸಂಸ್ಥೆ: ಬಿಸಿಸಿಐ ತಮಿಳುನಾಡು ಸಂಘಗಳ ನೋಂದಣಿ ಕಾಯ್ದೆಯಡಿ (Tamil Nadu Societies Registration Act) ನೋಂದಾಯಿಸಲ್ಪಟ್ಟ ಒಂದು ಖಾಸಗಿ ಸ್ವಾಯತ್ತ ಸಂಸ್ಥೆಯಾಗಿದೆ. ಇದು ಸಂವಿಧಾನದ ಮೂಲಕವಾಗಲಿ ಅಥವಾ ಸಂಸತ್ತಿನ ಕಾನೂನಿನ ಮೂಲಕವಾಗಲಿ ರಚನೆಯಾಗಿಲ್ಲ.
- ಸರ್ಕಾರದ ಹಣಕಾಸು ನೆರವು ಇಲ್ಲ: ಬಿಸಿಸಿಐ ತನ್ನ ಆದಾಯವನ್ನು ಪ್ರಸಾರ ಹಕ್ಕುಗಳು (Media Rights), ಐಪಿಎಲ್ (IPL), ಪ್ರಾಯೋಜಕತ್ವ (Sponsorship) ಮತ್ತು ಟಿಕೆಟ್ ಮಾರಾಟದ ಮೂಲಕ ಸ್ವತಂತ್ರವಾಗಿ ಗಳಿಸುತ್ತದೆ. ಸರ್ಕಾರದಿಂದ ಯಾವುದೇ ಆರ್ಥಿಕ ಧನಸಹಾಯ ಪಡೆಯುವುದಿಲ್ಲ.
- ತೆರಿಗೆ ವಿನಾಯಿತಿ ಅಂದರೆ ಧನಸಹಾಯವಲ್ಲ: ಬಿಸಿಸಿಐ ಕ್ರೀಡಾ ಸಂಸ್ಥೆಯಾಗಿ ಪಡೆಯುವ ಆದಾಯ ತೆರಿಗೆ ವಿನಾಯಿತಿಗಳನ್ನು ಸರ್ಕಾರದ "ಗಣನೀಯ ಧನಸಹಾಯ" (Substantive Financing) ಎಂದು ಪರಿಗಣಿಸಲು ಸಾಧ್ಯವಿಲ್ಲ.
- ಸರ್ಕಾರದ ನೇರ ನಿಯಂತ್ರಣವಿಲ್ಲ: ಬಿಸಿಸಿಐನ ದೈನಂದಿನ ಆಡಳಿತ, ಅಧಿಕಾರಿಗಳ ನೇಮಕಾತಿ ಅಥವಾ ಆಂತರಿಕ ನಿರ್ಧಾರಗಳಲ್ಲಿ ಸರ್ಕಾರದ ಯಾವುದೇ ಹಸ್ತಕ್ಷೇಪ ಅಥವಾ ನಿಯಂತ್ರಣ ಇರುವುದಿಲ್ಲ.
➤ಕ್ರಿಕೆಟ್ ಆಡಳಿತದ ಮೇಲಾಗುವ ಪರಿಣಾಮ:
- ಮಾಹಿತಿ ನೀಡುವ ಕಡ್ಡಾಯವಿಲ್ಲ: ಸಾರ್ವಜನಿಕರು ಇನ್ಮುಂದೆ ಬಿಸಿಸಿಐಗೆ ಆರ್‌ಟಿಐ ಅರ್ಜಿ ಸಲ್ಲಿಸಿ ಆಟಗಾರರ ಆಯ್ಕೆ ಪ್ರಕ್ರಿಯೆ, ಆಂತರಿಕ ವೆಚ್ಚಗಳು ಅಥವಾ ಒಪ್ಪಂದಗಳ ಬಗ್ಗೆ ಮಾಹಿತಿ ಕೇಳಲು ಸಾಧ್ಯವಿಲ್ಲ.
- ರಾಷ್ಟ್ರೀಯ ಕ್ರೀಡಾ ಆಡಳಿತ ಕಾಯ್ದೆ 2025:ಇತ್ತೀಚೆಗೆ ತರಲಾದ ಈ ಕಾಯ್ದೆಯು ಕೇವಲ ಸರ್ಕಾರಿ ಅನುದಾನ ಪಡೆಯುವ ಕ್ರೀಡಾ ಸಂಸ್ಥೆಗಳಿಗೆ ಮಾತ್ರ ಆರ್‌ಟಿಐ ಅನ್ವಯಿಸುತ್ತದೆ ಎಂದು ಹೇಳುತ್ತದೆ. ಬಿಸಿಸಿಐ ಅನುದಾನ ಪಡೆಯದ ಕಾರಣ ಇದರಲ್ಲಿಯೂ ವಿನಾಯಿತಿ ಪಡೆದಿದೆ.
ಏಪ್ರಿಲ್ ತಿಂಗಳ ಪ್ರಚಲಿತ ಘಟನೆಗಳನ್ನು ವೀಕ್ಷಿಸಲು ಇಲ್ಲಿ ಕ್ಲಿಕ್ ಮಾಡಿ