Job Description: ➤ ವಿಶ್ವ ಆರೋಗ್ಯ ಸಂಸ್ಥೆಯು (WHO) ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋ (DRC) ಮತ್ತು ಉಗಾಂಡಾದಲ್ಲಿ ಹರಡುತ್ತಿರುವ ಭೀಕರ ‘ಎಬೋಲಾ ವೈರಸ್’ ಸಾಂಕ್ರಾಮಿಕ ರೋಗವನ್ನು ‘ಅಂತರರಾಷ್ಟ್ರೀಯ ಕಳಕಳಿಯ ಸಾರ್ವಜನಿಕ ಆರೋಗ್ಯ ತುರ್ತುಪರಿಸ್ಥಿತಿ’ (PHEIC - Public Health Emergency of International Concern) ಎಂದು ಅಧಿಕೃತವಾಗಿ ಘೋಷಿಸಿದೆ. ಕಾಂಗೋ ಮತ್ತು ಉಗಾಂಡಾದ ಗಡಿ ಭಾಗಗಳಲ್ಲಿ ವೇಗವಾಗಿ ಹೆಚ್ಚುತ್ತಿರುವ ಪ್ರಕರಣಗಳು ಹಾಗೂ ಸಾವಿನ ಸಂಖ್ಯೆಯನ್ನು ಗಮನದಲ್ಲಿಟ್ಟುಕೊಂಡು WHO ಪ್ರಧಾನ ನಿರ್ದೇಶಕರಾದ ಟೆಡ್ರೊಸ್ ಅಧಾನೊಮ್ ಗೆಬ್ರೆಯೆಸಸ್ ಈ ನಿರ್ಧಾರವನ್ನು ಪ್ರಕಟಿಸಿದ್ದಾರೆ. ➤ ಪ್ರಸ್ತುತ ಎಬೋಲಾ ಹರಡುವಿಕೆಗೆ ಕಾರಣ: ಸಾಮಾನ್ಯವಾಗಿ ಎಬೋಲಾದಲ್ಲಿ ‘ಜೈರ್’ (Zaire strain) ವೈರಸ್ ಹೆಚ್ಚು ಪರಿಚಿತ. ಆದರೆ ಪ್ರಸ್ತುತ ಹರಡುತ್ತಿರುವುದು ಅತ್ಯಂತ ಅಪರೂಪದ ಮತ್ತು ಅಪಾಯಕಾರಿ ‘ಬುಂದಿಬುಗ್ಯೋ ವೈರಸ್’ (Bundibugyo virus - BVD) ತಳಿಯಾಗಿದೆ. - ಹಾಟ್‌ಸ್ಪಾಟ್‌ಗಳು: ಕಾಂಗೋದ ಇತುರಿ ಪ್ರಾಂತ್ಯದ ಬುನಿಯಾ, ರಾವಂಪಾರಾ ಮತ್ತು ಚಿನ್ನದ ಗಣಿಗಾರಿಕೆ ನಡೆಯುವ ಮೊಂಗ್ಬಾಲು ಎಂಬಲ್ಲಿ ಇದು ತೀವ್ರವಾಗಿ ಹರಡುತ್ತಿದೆ. ಅಲ್ಲದೆ ಉಗಾಂಡಾದ ರಾಜಧಾನಿ ಕಂಪಾಲಾ ಹಾಗೂ ಕಾಂಗೋದ ರಾಜಧಾನಿ ಕಿನ್ಶಾಸಾಗೂ ಈ ರೋಗ ಲಕ್ಷಣಗಳು ವ್ಯಾಪಿಸಿವೆ.- ಪ್ರಸ್ತುತ ಸ್ಥಿತಿ: ಪ್ರಸ್ತುತ ನೂರಕ್ಕೂ ಹೆಚ್ಚು ಶಂಕಿತ ಸಾವುಗಳು ಮತ್ತು ನೂರಾರು ಸಕ್ರಿಯ ಪ್ರಕರಣಗಳು ವರದಿಯಾಗಿವೆ. ವೈದ್ಯಕೀಯ ಸಿಬ್ಬಂದಿಗಳು ಸಹ ಈ ರೋಗಕ್ಕೆ ಬಲಿಯಾಗುತ್ತಿರುವುದು ಜಾಗತಿಕ ಆತಂಕಕ್ಕೆ ಕಾರಣವಾಗಿದೆ. ಇದು ಜಾಗತಿಕ ತುರ್ತುಪರಿಸ್ಥಿತಿಯಾಗಿದ್ದರೂ, ಪ್ರಸ್ತುತ ಜಾಗತಿಕ ಸಾಂಕ್ರಾಮಿಕ (Pandemic Emergency) ಮಟ್ಟ ತಲುಪಿಲ್ಲ ಎಂದು WHO ಸ್ಪಷ್ಟಪಡಿಸಿದೆ. ➤ ಎಬೋಲಾ ವೈರಸ್ ಕಾಯಿಲೆಯು (EVD) ಮನುಷ್ಯರು ಮತ್ತು ಮಾನವರೇತರ ಪ್ರೈಮೇಟ್‌ಗಳಲ್ಲಿ (ಕೋತಿಗಳು, ಗೊರಿಲ್ಲಾಗಳು) ಕಾಣಿಸಿಕೊಳ್ಳುವ ಒಂದು ತೀವ್ರ ಹಾಗೂ ಮಾರಣಾಂತಿಕ ಕಾಯಿಲೆಯಾಗಿದೆ. ಇದನ್ನು ಮೊದಲ ಬಾರಿಗೆ 1976 ರಲ್ಲಿ ಕಾಂಗೋದ ಎಬೋಲಾ ನದಿಯ ಬಳಿ ಪತ್ತೆಹಚ್ಚಲಾಗಿತ್ತು, ಆದ್ದರಿಂದ ಇದಕ್ಕೆ ‘ಎಬೋಲಾ’ ಎಂದು ಹೆಸರಿಡಲಾಗಿದೆ. ಈ ರೋಗದ ಮರಣ ಪ್ರಮಾಣವು ಶೇಕಡಾ 25 ರಿಂದ 90 ರಷ್ಟಿರುತ್ತದೆ.➤ ರೋಗದ ಲಕ್ಷಣಗಳು: ಎಬೋಲಾ ವೈರಸ್ ದೇಹ ಸೇರಿದ ನಂತರ 2 ರಿಂದ 21 ದಿನಗಳ ಒಳಗೆ (Incubation Period) ರೋಗ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ:- ಆರಂಭಿಕ ಲಕ್ಷಣಗಳು: ತೀವ್ರ ಜ್ವರ, ಅತಿಯಾದ ಸುಸ್ತು, ಸ್ನಾಯು ನೋವು, ತಲೆನೋವು ಮತ್ತು ಗಂಟಲು ನೋವು.- ದ್ವಿತೀಯ ಹಂತದ ಲಕ್ಷಣಗಳು: ವಾಂತಿ, ಭೇದಿ, ಚರ್ಮದ ಮೇಲೆ ಕೆಂಪು ದದ್ದುಗಳು (Rash), ಯಕೃತ್ (Liver) ಮತ್ತು ಮೂತ್ರಪಿಂಡಗಳ (Kidney) ವೈಫಲ್ಯ.- ತೀವ್ರ ಹಂತ: ದೇಹದ ಆಂತರಿಕ ಮತ್ತು ಬಾಹ್ಯ ಅಂಗಗಳಿಂದ ರಕ್ತಸ್ರಾವವಾಗುವುದು (ಉದಾಹರಣೆಗೆ: ಒಸಡುಗಳು, ಮಲದಲ್ಲಿ ರಕ್ತ ಬೀಳುವುದು).➤ ಎಬೋಲಾ ವೈರಸ್ ಸೋಂಕಿತ ಪ್ರಾಣಿಗಳ (ಬಾವಲಿ, ಕೋತಿ) ಅಥವಾ ಸೋಂಕಿತ ವ್ಯಕ್ತಿಯ ರಕ್ತ ಮತ್ತು ದೈಹಿಕ ದ್ರವಗಳ (ಬೆವರು, ಲಾಲಾರಸ ಇತ್ಯಾದಿ) ನೇರ ಸಂಪರ್ಕದಿಂದ ಹರಡುತ್ತದೆಯೇ ಹೊರತು ಗಾಳಿಯ ಮೂಲಕ ಹರಡುವುದಿಲ್ಲ.➤ ಚಿಕಿತ್ಸೆ ಮತ್ತು ಲಸಿಕೆ ಲಭ್ಯತೆ (Treatment and Vaccines)- ಲಸಿಕೆಯ ಕೊರತೆ: ಈ ಹಿಂದಿನ ‘ಜೈರ್’ (Zaire) ಎಬೋಲಾ ತಳಿಗೆ ‘Ervebo’ ನಂತಹ ಪರಿಣಾಮಕಾರಿ ಲಸಿಕೆಗಳು ಲಭ್ಯವಿವೆ. ಆದರೆ, ಪ್ರಸ್ತುತ ಹರಡುತ್ತಿರುವ ‘ಬುಂದಿಬುಗ್ಯೋ’ (Bundibugyo) ತಳಿಗೆ ಯಾವುದೇ ಅಧಿಕೃತವಾಗಿ ಅನುಮೋದಿಸಲಾದ ನಿರ್ದಿಷ್ಟ ಲಸಿಕೆ ಅಥವಾ ಆಂಟಿವೈರಲ್ ಚಿಕಿತ್ಸೆ ಲಭ್ಯವಿಲ್ಲ. ಇದು ಪ್ರಸ್ತುತ ಬಿಕ್ಕಟ್ಟಿನ ಅತ್ಯಂತ ಕಳವಳಕಾರಿ ಅಂಶವಾಗಿದೆ. - ಚಿಕಿತ್ಸಾ ವಿಧಾನ: ಪ್ರಸ್ತುತ ರೋಗಿಗಳಿಗೆ ರೋಗಲಕ್ಷಣಗಳಿಗೆ ತಕ್ಕಂತೆ ಚಿಕಿತ್ಸೆ (Symptomatic Treatment) ನೀಡಲಾಗುತ್ತಿದೆ. ದೇಹದಲ್ಲಿನ ನೀರಿನಂಶವನ್ನು ಕಾಯ್ದುಕೊಳ್ಳಲು ಒಆರ್‌ಎಸ್ (ORS) ಮತ್ತು ಇಂಟ್ರಾವೆನಸ್ (IV) ದ್ರವಗಳನ್ನು ನೀಡುವುದು ಅತ್ಯಗತ್ಯವಾಗಿದೆ.
