➤ ಕೇಂದ್ರ ಸಿಬ್ಬಂದಿ, ಸಾರ್ವಜನಿಕ ಕುಂದುಕೊರತೆ ಮತ್ತು ಪಿಂಚಣಿ ಸಚಿವಾಲಯದ ರಾಜ್ಯ ಸಚಿವರಾದ ಡಾ. ಜಿತೇಂದ್ರ ಸಿಂಗ್ ಅವರು ದೆಹಲಿಯ ವಿಜ್ಞಾನ ಭವನದಲ್ಲಿ ನಡೆದ ಸಮಾರಂಭದಲ್ಲಿ ರಾಷ್ಟ್ರೀಯ ‘ಅನುಭವ್ ಪ್ರಶಸ್ತಿಗಳು 2026’ (National Anubhav Awards 2026) ಅನ್ನು ಪ್ರದಾನ ಮಾಡಿದರು. ಕೇಂದ್ರ ಸರ್ಕಾರದ ಪಿಂಚಣಿ ಮತ್ತು ಪಿಂಚಣಿದಾರರ ಕಲ್ಯಾಣ ಇಲಾಖೆ (DoPPW) ಆಯೋಜಿಸಿದ್ದ ಈ 9ನೇ ಪ್ರಶಸ್ತಿ ಪ್ರದಾನ ಸಮಾರಂಭದ ಜೊತೆಗೆ 60ನೇ ನಿವೃತ್ತಿ ಪೂರ್ವ ಸಲಹಾ ಕಾರ್ಯಾಗಾರವನ್ನು (Pre-Retirement Counselling Workshop) ಸಹ ನಡೆಸಲಾಯಿತು.
➤ 'ಅನುಭವ್' ಪೋರ್ಟಲ್:'ಅನುಭವ್' (Anubhav Platform) ಎಂಬುದು ಮಾರ್ಚ್ 2015 ರಲ್ಲಿ ಕೇಂದ್ರ ಸರ್ಕಾರದಿಂದ ಪ್ರಾರಂಭಿಸಲಾದ ಒಂದು ವಿಶಿಷ್ಟ ಆನ್‌ಲೈನ್ ವೇದಿಕೆಯಾಗಿದೆ.

• ಉದ್ದೇಶ: ಕೇಂದ್ರ ಸರ್ಕಾರ, 12 ಸಾರ್ವಜನಿಕ ವಲಯದ ಬ್ಯಾಂಕ್‌ಗಳು (PSBs) ಮತ್ತು ಕೇಂದ್ರ ಸಾರ್ವಜನಿಕ ವಲಯದ ಉದ್ಯಮಗಳ (CPSEs) ನಿವೃತ್ತ ಅಥವಾ ನಿವೃತ್ತಿಯಾಗುತ್ತಿರುವ ಉದ್ಯೋಗಿಗಳು ತಮ್ಮ ಸೇವಾ ಅವಧಿಯ ಸ್ಮರಣೀಯ ಅನುಭವಗಳು, ಸುಧಾರಣೆಗಳು ಮತ್ತು ಕಲ್ಪನೆಗಳನ್ನು ಬರವಣಿಗೆಯ ರೂಪದಲ್ಲಿ ಹಂಚಿಕೊಳ್ಳಲು ಇದು ಅವಕಾಶ ನೀಡುತ್ತದೆ.
• 2026 ರ ಪ್ರಶಸ್ತಿ ಆಯ್ಕೆ ಪ್ರಕ್ರಿಯೆ: 2025 ರ ಏಪ್ರಿಲ್ 1 ರಿಂದ 2026 ರ ಮಾರ್ಚ್ 31 ರ ನಡುವೆ 'ಅನುಭವ್' ಪೋರ್ಟಲ್‌ನಲ್ಲಿ ಪ್ರಕಟವಾದ ದಾಖಲೆಯ 2,141 ಬರಹಗಳನ್ನು ಪರಿಶೀಲಿಸಿ, ಅದರಲ್ಲಿ ಅತ್ಯುತ್ತಮ ಕೊಡುಗೆ ನೀಡಿದ 15 ಜನರನ್ನು ಈ ಬಾರಿಯ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ.

➤ 2026 ರ ಪುರಸ್ಕೃತರ ಪ್ರಮುಖ ಕೊಡುಗೆಗಳು:

• ಪಾಸ್‌ಪೋರ್ಟ್ ಸೇವಾ ಕೇಂದ್ರ (Passport Seva Kendra): ಸಾರ್ವಜನಿಕ ಸೇವೆಯನ್ನು ಸರಳಗೊಳಿಸುವುದು.
• ಆಡಳಿತಾತ್ಮಕ ಮತ್ತು ನಿಯಮಗಳ ಸುಧಾರಣೆ: ಹಳೆಯ ಮತ್ತು ಅಪ್ರಸ್ತುತ ಕಾನೂನುಗಳನ್ನು ರದ್ದುಗೊಳಿಸಿ ಹೊಸ ಆಧುನಿಕ ನಿಯಮಗಳನ್ನು ಜಾರಿಗೆ ತರುವುದು.
• ತಂತ್ರಜ್ಞಾನದ ಅಳವಡಿಕೆ: ಲೆಕ್ಕಪತ್ರ (Accounting) ಮತ್ತು ಆಡಳಿತದಲ್ಲಿ ಆಧುನಿಕ ತಂತ್ರಜ್ಞಾನ ಬಳಸುವುದು.
• ಇಂಧನ ಸಂರಕ್ಷಣೆ (Energy Conservation): ಸರ್ಕಾರಿ ಸಂಸ್ಥೆಗಳಲ್ಲಿ ಇಂಧನ ಮತ್ತು ಸಂಪನ್ಮೂಲಗಳ ಉಳಿತಾಯ.

➤ ಪ್ರಮುಖ ಕಾರ್ಯಕ್ರಮಗಳು ಮತ್ತು ಬಿಡುಗಡೆಗಳು:

1. ಪಿಂಚಣಿ ಮಿತ್ರ ಕೈಪಿಡಿ (Handbook on Pension Mitra): ನಿವೃತ್ತ ಉದ್ಯೋಗಿಗಳಿಗೆ ಪಿಂಚಣಿ ಪ್ರಕ್ರಿಯೆಗಳನ್ನು ಸುಲಭವಾಗಿ ಅರ್ಥೈಸಲು ಈ ಕೈಪಿಡಿಯನ್ನು ಬಿಡುಗಡೆ ಮಾಡಲಾಯಿತು.
2. ಡಿಜಿಟಲ್ ಲೈಫ್ ಸರ್ಟಿಫಿಕೇಟ್ (DLC) ಅಭಿಯಾನ-5: ಪಿಂಚಣಿದಾರರು ಮುಖ ಗುರುತಿಸುವಿಕೆ (Face Authentication) ಹಾಗೂ ಆನ್‌ಲೈನ್ ಮೂಲಕ ಸುಲಭವಾಗಿ ಜೀವಿತ ಪ್ರಮಾಣಪತ್ರ ಸಲ್ಲಿಸಲು 'ಡಿಜಿಟಲ್ ಲೈಫ್ ಸರ್ಟಿಫಿಕೇಟ್ Campaign 5.0' ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಲಾಯಿತು.
3. ಬ್ಯಾಂಕ್ ಪ್ರದರ್ಶನ (Bank Exhibition): ನಿವೃತ್ತ ನೌಕರರಿಗಾಗಿ ವಿಶೇಷ ಬ್ಯಾಂಕಿಂಗ್ ಉತ್ಪನ್ನಗಳು ಮತ್ತು ಸೇವೆಗಳನ್ನು ಪ್ರದರ್ಶಿಸಲು 17 ಪಿಂಚಣಿ ವಿತರಿಸುವ ಬ್ಯಾಂಕ್‌ಗಳು ಈ ಪ್ರದರ್ಶನದಲ್ಲಿ ಭಾಗವಹಿಸಿದ್ದವು.