Job Description: * ಪ್ರಕೃತಿಯನ್ನು ಕೇವಲ ಸಂಪನ್ಮೂಲವಾಗಿ ನೋಡುವ ಬದಲು, ಅದನ್ನು ಹಕ್ಕುಗಳನ್ನು ಹೊಂದಿರುವ ಜೀವಿಗಳಾಗಿ ಪರಿಗಣಿಸುವ ನಿಟ್ಟಿನಲ್ಲಿ ಪೆರು ದೇಶವು ಇಡೀ ಜಗತ್ತಿಗೆ ಮಾದರಿಯಾಗಿದೆ. ಪೆರುನ ಸಾಟಿಪೊ (Satipo) ಮತ್ತು ನೌಟಾ (Nauta) ಮಹಾನಗರ ಪಾಲಿಕೆಗಳು ಅಮೆಜಾನ್‌ನ ಸ್ಟಿಂಗ್‌ಲೆಸ್ ಜೇನುನೊಣಗಳಿಗೆ "ಕಾನೂನು ಹಕ್ಕುಗಳನ್ನು" ನೀಡುವ ಐತಿಹಾಸಿಕ ಆದೇಶಗಳನ್ನು ಹೊರಡಿಸಿವೆ.*ಇವು ಮೆಲಿಪೊನಿನಿ ಗುಂಪಿಗೆ ಸೇರಿದ, ಕಚ್ಚುವ ಶಕ್ತಿ ಇಲ್ಲದ ಅಥವಾ ದುರ್ಬಲವಾದ ಜೇನುನೊಣಗಳು. ಉಷ್ಣವಲಯ ಪ್ರದೇಶಗಳಲ್ಲಿ ಕಂಡುಬರುವ ಸುಮಾರು 500 ಜಾತಿಗಳಲ್ಲಿ ಅರ್ಧದಷ್ಟು ಅಮೆಜಾನ್‌ನಲ್ಲಿ ಇದ್ದು, ಪೆರುದಲ್ಲಿ ಮಾತ್ರವೇ 170ಕ್ಕೂ ಹೆಚ್ಚು ಜಾತಿಗಳಿವೆ.* ಸುಮಾರು 80 ಮಿಲಿಯನ್ ವರ್ಷಗಳಿಂದ ಸ್ಟಿಂಗ್‌ಲೆಸ್ ಜೇನುನೊಣಗಳು ಪರಿಸರದಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದ್ದು, ಅಮೆಜಾನ್‌ನ 80%ಕ್ಕೂ ಹೆಚ್ಚು ಸಸ್ಯಗಳಿಗೆ ಪರಾಗಸ್ಪರ್ಶ ಮಾಡುತ್ತವೆ. ಕಾಕಾವೋ, ಕಾಫಿ, ಅವಕಾಡೋ ಬೆಳೆಗಳಿಗೆ ಅವು ಅಗತ್ಯವಾಗಿದ್ದು, ಇವುಗಳ ಸಂಖ್ಯೆ ಕುಸಿತವಾದರೆ ಅರಣ್ಯ ಪುನರುತ್ಪಾದನೆ, ಆಹಾರ ಭದ್ರತೆ ಮತ್ತು ಜೀವವೈವಿಧ್ಯಕ್ಕೆ ಗಂಭೀರ ಅಪಾಯ ಉಂಟಾಗುತ್ತದೆ.* ಕಾನೂನು ಹಕ್ಕುಗಳು ಮತ್ತು ಸಂರಕ್ಷಣಾ ಪರಿಣಾಮ : 2024ರಲ್ಲಿ ಪೆರು ದೇಶವು ಸ್ಟಿಂಗ್‌ಲೆಸ್ ಜೇನುನೊಣಗಳನ್ನು ಸ್ಥಳೀಯ ಪ್ರಜಾತಿಗಳೆಂದು ಗುರುತಿಸುವ ರಾಷ್ಟ್ರೀಯ ಕಾನೂನು ಜಾರಿಗೆ ತಂದಿತ್ತು. ಇದರ ಮುಂದುವರಿದ ಭಾಗವಾಗಿ, ಸಾಟಿಪೊ ಮತ್ತು ನೌಟಾ ಮಹಾನಗರಗಳ ಆದೇಶಗಳು ಜೇನುನೊಣಗಳಿಗೆ ಅಸ್ತಿತ್ವದಲ್ಲಿರುವ ಹಕ್ಕು, ಜನಸಂಖ್ಯೆ ಪುನರುತ್ಪಾದನೆ, ವಾಸಸ್ಥಾನ ಪುನಃಸ್ಥಾಪನೆ ಮತ್ತು ಮಾಲಿನ್ಯರಹಿತ ಪರಿಸರದಲ್ಲಿ ಬದುಕುವ ಹಕ್ಕುಗಳನ್ನು ಒಪ್ಪಿಕೊಂಡಿವೆ. ಈ ಕಾನೂನು ಚೌಕಟ್ಟು ಮೂಲನಿವಾಸಿ ನಾಯಕರ ಸಹಭಾಗಿತ್ವದಲ್ಲಿ ರೂಪುಗೊಂಡಿದ್ದು, ಜೇನುನೊಣಗಳ ರಕ್ಷಣೆ ಮತ್ತು ಮೂಲನಿವಾಸಿಗಳ ಸಾಂಸ್ಕೃತಿಕ–ಪರಿಸರ ಹಕ್ಕುಗಳನ್ನು ಪರಸ್ಪರ ಜೋಡಿಸುತ್ತದೆ.* ಈ ಹಕ್ಕುಗಳನ್ನು ರಾಷ್ಟ್ರೀಯ ಮಟ್ಟದಲ್ಲಿ ವಿಸ್ತರಿಸುವ ಪ್ರಯತ್ನಗಳು ನಡೆಯುತ್ತಿದ್ದು, ಇದು ಭವಿಷ್ಯದಲ್ಲಿ ಜಗತ್ತಿನಾದ್ಯಂತ ಕೀಟ ಸಂರಕ್ಷಣೆಗೆ ಮಾದರಿಯಾಗುವ ಸಾಧ್ಯತೆ ಹೊಂದಿದೆ.
