Job Description: ಡಾ. ರಾಮಚಂದ್ರ ಗುಹಾ ಅವರಿಗೆ 2025ರ ಮಹಾತ್ಮ ಗಾಂಧಿ ಸೇವಾ ಪ್ರಶಸ್ತಿ * ಪ್ರಸಿದ್ಧ ಇತಿಹಾಸಕಾರ, ಅಂಕಣಕಾರ ಮತ್ತು ಚಿಂತಕರಾದ ಡಾ. ರಾಮಚಂದ್ರ ಗುಹಾ ಅವರನ್ನು 2025ನೇ ಸಾಲಿನ ಮಹಾತ್ಮ ಗಾಂಧಿ ಸೇವಾ ಪ್ರಶಸ್ತಿಗೆ ಕರ್ನಾಟಕ ಸರ್ಕಾರ ಆಯ್ಕೆ ಮಾಡಿದೆ. * ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯು ಪ್ರತಿ ವರ್ಷ ನೀಡುವ ಈ ಗೌರವಾನ್ವಿತ ಪ್ರಶಸ್ತಿ, ಮಹಾತ್ಮ ಗಾಂಧೀಜಿಯವರ ತತ್ವಗಳು, ಆಧ್ಯಾತ್ಮಿಕ ಮೌಲ್ಯಗಳು ಮತ್ತು ಅಹಿಂಸೆಯ ಆದರ್ಶಗಳನ್ನು ಸಮಾಜದಲ್ಲಿ ಪ್ರತಿಷ್ಠಾಪಿಸಲು ಮಹತ್ವದ ಕೊಡುಗೆ ನೀಡಿದ ವ್ಯಕ್ತಿಗಳಿಗೂ, ಸಂಸ್ಥೆಗಳಿಗೂ ಪ್ರದಾನ ಮಾಡಲಾಗುತ್ತದೆ. * ಡಾ. ರಾಮಚಂದ್ರ ಗುಹಾ ಅವರು ಭಾರತದ ಇತಿಹಾಸ, ಸಮಾಜ ಮತ್ತು ಗಾಂಧೀಜಿಯವರ ಜೀವನದ ಕುರಿತು ಆಳವಾದ ಅಧ್ಯಯನ ಮಾಡಿ, ತಮ್ಮ ಬರಹಗಳ ಮೂಲಕ ಗಾಂಧೀಜಿಯವರ ವಿಚಾರಧಾರೆಗಳನ್ನು ಜನಸಾಮಾನ್ಯರ ಮನದಲ್ಲಿ ಬಿತ್ತಿದ್ದಾರೆ. ಅವರ ಬರಹಗಳು ಕೇವಲ ಇತಿಹಾಸದ ದಾಖಲೆಗಳಷ್ಟೇ ಅಲ್ಲ, ಸಮಕಾಲೀನ ಸಮಾಜಕ್ಕೆ ದಾರಿದೀಪವಾಗಿವೆ. ಗುಹಾರವರ ಪ್ರಮುಖ ಕೃತಿಗಳು: India After Gandhi: ಸ್ವಾತಂತ್ರ್ಯಾನಂತರದ ಭಾರತದ ರಾಜಕೀಯ ಮತ್ತು ಸಾಮಾಜಿಕ ಬದಲಾವಣೆಗಳ ಆಳವಾದ ವಿಶ್ಲೇಷಣೆ. A Corner of a Foreign Field: ಭಾರತದಲ್ಲಿ ಕ್ರಿಕೆಟ್ ಮತ್ತು ಅದರ ಸಾಮಾಜಿಕ-ಸಾಂಸ್ಕೃತಿಕ ಪರಿಣಾಮಗಳ ಕುರಿತಾದ ಮಹತ್ವದ ಕೃತಿ. Gandhi Before India: ಗಾಂಧೀಜಿಯವರ ದಕ್ಷಿಣ ಆಫ್ರಿಕಾದ ಹೋರಾಟದ ದಿನಗಳು ಮತ್ತು ಅವರ ವಿಚಾರಧಾರೆಗಳ ಆಕಾರ. Gandhi: The Years That Changed the World: 1914 ರಿಂದ 1948ರವರೆಗೆ ಗಾಂಧೀಜಿಯವರ ಜೀವನದ ನಿರ್ಣಾಯಕ ಘಟ್ಟಗಳ ಸಂಪೂರ್ಣ ಅಧ್ಯಯನ. The Unquiet Woods: ಹಿಮಾಲಯದ ಅರಣ್ಯ ಸಂರಕ್ಷಣಾ ಚಳವಳಿಗಳ ಸಾಮಾಜಿಕ ಮತ್ತು ಪರಿಸರ ಸಂಬಂಧಿ ಇತಿಹಾಸ. #ಪ್ರಶಸ್ತಿಯ ಮಹತ್ವ:ಈ ಪ್ರಶಸ್ತಿಯ ಮೂಲಕ ಡಾ. ಗುಹಾರವರ ಗಾಂಧೀಯ ಚಿಂತನೆಗಳನ್ನು ಮುಂದಿನ ಪೀಳಿಗೆಗಳಿಗೆ ತಲುಪಿಸುವಲ್ಲಿ, ಅವರ ಬರಹಗಳು ಹೊಂದಿರುವ ಆಳವಾದ ಪ್ರಭಾವವನ್ನು ರಾಜ್ಯ ಸರ್ಕಾರ ಗುರುತಿಸಿದೆ. ಅವರು ಕೇವಲ ಇತಿಹಾಸಕಾರನಷ್ಟೇ ಅಲ್ಲ, ಸಮಾಜ ಚಿಂತಕರಾಗಿ ದೇಶದ ಬೌದ್ಧಿಕ ಜೀವನಕ್ಕೆ ನೀಡಿರುವ ಕೊಡುಗೆ ಅತ್ಯಂತ ಸ್ಮರಣೀಯವಾಗಿದೆ.
