➤ ಫೆಬ್ರವರಿ 2026 ರಲ್ಲಿ ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಜಂಟಿಯಾಗಿ ಇರಾನ್ ಮೇಲಿನ ಸರಣಿ ವೈಮಾನಿಕ ದಾಳಿಗಳನ್ನು ಪ್ರಾರಂಭಿಸಿದವು. ಅಮೆರಿಕಾದ ಸಂವಿಧಾನದ ಪ್ರಕಾರ, ಯಾವುದೇ ದೇಶದ ಮೇಲೆ ಅಧಿಕೃತವಾಗಿ ಯುದ್ಧ ಘೋಷಿಸುವ ಸಂಪೂರ್ಣ ಹಕ್ಕು ಅಲ್ಲಿನ ಸಂಸತ್ತಿಗೆ (ಕಾಂಗ್ರೆಸ್) ಇರುತ್ತದೆ.ಆದರೆ, ಅಧ್ಯಕ್ಷ ಟ್ರಂಪ್ ಸಂಸತ್ತಿನ ಮುನ್ಸೂಚನೆ ಅಥವಾ ಅನುಮತಿಯಿಲ್ಲದೆ ಈ ಮಿಲಿಟರಿ ಕಾರ್ಯಾಚರಣೆಯನ್ನು ಮುನ್ನಡೆಸುತ್ತಿದ್ದಾರೆ ಎಂದು ವಿರೋಧ ಪಕ್ಷವಾದ ಡೆಮೋಕ್ರಾಟ್‌ಗಳು ಆರೋಪಿಸುತ್ತಾ ಬಂದಿದ್ದಾರೆ.
➤ ಅಮೆರಿಕಾದ'ಯುದ್ಧ ಅಧಿಕಾರಗಳ ಕಾಯ್ದೆ 1973'(War Powers Resolution of 1973) ಪ್ರಕಾರ, ಅಧ್ಯಕ್ಷರು ಯಾವುದೇ ದೇಶದ ವಿರುದ್ಧ ಮಿಲಿಟರಿ ಕ್ರಮ ಕೈಗೊಂಡರೆ 60 ದಿನಗಳ ಒಳಗಾಗಿ ಸಂಸತ್ತಿನ ಕಡ್ಡಾಯ ಅನುಮೋದನೆ ಪಡೆಯಬೇಕು. ಮೇ 1 ರ ಹೊತ್ತಿಗೆ ಈ ಗಡುವು ಮುಗಿದಿದ್ದರೂ, ಕದನ ವಿರಾಮ ಜಾರಿಯಲ್ಲಿದೆ ಎಂಬ ಕಾರಣ ನೀಡಿ ಶ್ವೇತಭವನವು ಯುದ್ಧವನ್ನು ಮುಂದುವರಿಸಿತ್ತು. ಈ ಹಿನ್ನೆಲೆಯಲ್ಲಿ ಈ ನಿರ್ಣಯವನ್ನು ಮಂಡಿಸಲಾಗಿದೆ.
➤ಸೆನೆಟ್‌ನಲ್ಲಿ ನಡೆದ ರಾಜಕೀಯ ಆಟ ಮತ್ತು ಕ್ರಾಸ್ ವೋಟಿಂಗ್:ಡೆಮೋಕ್ರಾಟ್ ಪಕ್ಷದ ಸೆನೆಟರ್ ಟಿಮ್ ಕೈನ್ (Tim Kaine) ನೇತೃತ್ವದಲ್ಲಿ ಈ ಪ್ರಸ್ತಾವನೆಯನ್ನು ತರಲಾಯಿತು. ಇದಕ್ಕೂ ಮುನ್ನ ನಡೆದ 7 ಪ್ರಯತ್ನಗಳಲ್ಲಿ ರಿಪಬ್ಲಿಕನ್ ಪಕ್ಷದ ಬಹುಮತದಿಂದಾಗಿ ಇದು ಬಿದ್ದುಹೋಗಿತ್ತು. ಆದರೆ 8ನೇ ಬಾರಿ ನಡೆದ ಈ ಪ್ರಕ್ರಿಯೆಯಲ್ಲಿ ನಾಟಕೀಯ ಬೆಳವಣಿಗೆಗಳು ನಡೆದವು: - ರಿಪಬ್ಲಿಕನ್ ನಾಯಕರ ಬಂಡಾಯ: ಸೂಸನ್ ಕಾಲಿನ್ಸ್, ಲಿಸಾ ಮುರ್ಕೋವ್ಸ್ಕಿ, ರಾಂಡ್ ಪಾಲ್ ಮತ್ತು ಇತ್ತೀಚೆಗೆ ಪ್ರೈಮರಿ ಚುನಾವಣೆಯಲ್ಲಿ ಟ್ರಂಪ್ ಬೆಂಬಲಿತ ಅಭ್ಯರ್ಥಿ ಎದುರು ಸೋತ ಬಿಲ್ ಕ್ಯಾಸಿಡಿ (Bill Cassidy) ಎಂಬ ನಾಲ್ವರು ರಿಪಬ್ಲಿಕನ್ ಸೆನೆಟರ್‌ಗಳು ಟ್ರಂಪ್ ವಿರುದ್ಧ ಮತ ಚಲಾಯಿಸಿದರು. - ಡೆಮೋಕ್ರಾಟ್‌ಗಳ ಒಗ್ಗಟ್ಟು: ಪೆನ್ಸಿಲ್ವೇನಿಯಾದ ಜಾನ್ ಫೆಟರ್‌ಮ್ಯಾನ್ ಹೊರತುಪಡಿಸಿ ಉಳಿದೆಲ್ಲಾ ಡೆಮೋಕ್ರಾಟ್‌ಗಳು ನಿರ್ಣಯದ ಪರ ಮತ ಹಾಕಿದರು. - ಮೂವರು ರಿಪಬ್ಲಿಕನ್ ಸೆನೆಟರ್‌ಗಳು ಮತದಾನಕ್ಕೆ ಗೈರುಹಾಜರಾಗಿದ್ದು ಕೂಡ ಡೆಮೋಕ್ರಾಟ್‌ಗಳಿಗೆ ವರದಾನವಾಯಿತು.
➤ ಸೆನೆಟ್‌ನಲ್ಲಿ ಈ ಪ್ರಕ್ರಿಯಾತ್ಮಕ ನಿರ್ಣಯ ಅಂಗೀಕಾರವಾಗಿದ್ದರೂ, ಇದು ಕಾನೂನಾಗಿ ಜಾರಿಗೆ ಬರಲು ಇನ್ನೂ ಹಂತಗಳಿವೆ:ಇದು ರಿಪಬ್ಲಿಕನ್ ನಿಯಂತ್ರಿತ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್ (ಕೆಳಮನೆ) ನಲ್ಲೂ ಅಂಗೀಕಾರವಾಗಬೇಕು.ಒಂದು ವೇಳೆ ಎರಡೂ ಮನೆಗಳಲ್ಲಿ ಪಾಸ್ ಆದರೂ, ಅಧ್ಯಕ್ಷ ಟ್ರಂಪ್ ತಮ್ಮ 'ವೀಟೋ' (Veto Power) ಅಧಿಕಾರ ಬಳಸಿ ಇದನ್ನು ವಜಾಗೊಳಿಸುವ ಅವಕಾಶವಿರುತ್ತದೆ. ಅದನ್ನು ಮುರಿಯಲು ಸಂಸತ್ತಿನ ಮೂರನೇ ಎರಡರಷ್ಟು ಬಹುಮತದ ಅಗತ್ಯವಿದೆ.