ರಾಷ್ಟ್ರಪತಿ ಭವನದಲ್ಲಿ ರಾಜಾಜಿ ಪ್ರತಿಮೆ ಅನಾವರಣ: ವಸಾಹತುಶಾಹಿ ಕುರುಹು ಅಳಿಸಿ ಭಾರತೀಯತೆಗೆ ಗೌರವ

ಪ್ರಚಲಿತ ಘಟನೆಗಳು

Authored by: Akshata Halli Date: 24 ಫೆಬ್ರುವರಿ 2026

➤ ನವದೆಹಲಿ: ಸ್ವತಂತ್ರ ಭಾರತದ ಮೊದಲ ಮತ್ತು ಏಕೈಕ ಭಾರತೀಯ ಗವರ್ನರ್ ಜನರಲ್, 'ಭಾರತ ರತ್ನ' ಚಕ್ರವರ್ತಿ ರಾಜಗೋಪಾಲಾಚಾರಿ (ರಾಜಾಜಿ) ಅವರ ಪ್ರತಿಮೆಯನ್ನು (Bust) ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಫೆಬ್ರವರಿ 23, 2026 ರಂದು ರಾಷ್ಟ್ರಪತಿ ಭವನದಲ್ಲಿ ಅನಾವರಣಗೊಳಿಸಿದರು.ಈ ಐತಿಹಾಸಿಕ ಕ್ರಮವು ಭಾರತದ ಮೇಲಿರುವ ವಸಾಹತುಶಾಹಿ ಮಾನಸಿಕತೆಯ ಕುರುಹುಗಳನ್ನು ತೊಡೆದುಹಾಕುವ ಸರ್ಕಾರದ ಸರಣಿ ಪ್ರಯತ್ನಗಳ ಭಾಗವಾಗಿದೆ.
➤ ಲಟೈನ್ಸ್ ಪ್ರತಿಮೆ ತೆರವು: ರಾಜಾಜಿಗೆ ಸಂದ ಗೌರವ: ರಾಷ್ಟ್ರಪತಿ ಭವನದ ಅಶೋಕ ಮಂಟಪದ ಬಳಿಯಿರುವ ಭವ್ಯವಾದ ತೆರೆದ ಮೆಟ್ಟಿಲುಗಳ ಮೇಲೆ ಈ ಹಿಂದೆ ನವದೆಹಲಿಯ ವಾಸ್ತುಶಿಲ್ಪಿ ಎಡ್ವಿನ್ ಲಟೈನ್ಸ್ ಅವರ ಪ್ರತಿಮೆಯಿತ್ತು. ಈಗ ಅದನ್ನು ತೆರವುಗೊಳಿಸಿ, ಅದರ ಸ್ಥಾನದಲ್ಲಿ ರಾಜಗೋಪಾಲಾಚಾರಿ ಅವರ ಪ್ರತಿಮೆಯನ್ನು ಪ್ರತಿಷ್ಠಾಪಿಸಲಾಗಿದೆ. ಮಹಾತ್ಮ ಗಾಂಧೀಜಿಯವರ ಪ್ರತಿಮೆಯ ನೇರ ಎದುರಲ್ಲೇ ರಾಜಾಜಿಯವರ ಪ್ರತಿಮೆ ಇರುವುದು ವಿಶೇಷ.
➤ ರಾಜಾಜಿ ಉತ್ಸವ: ಪ್ರತಿಮೆ ಅನಾವರಣದ ನಂತರ ರಾಷ್ಟ್ರಪತಿ ಭವನದ ಸಾಂಸ್ಕೃತಿಕ ಕೇಂದ್ರದಲ್ಲಿ'ರಾಜಾಜಿ ಉತ್ಸವ'ಆಯೋಜಿಸಲಾಗಿತ್ತು. ರಾಜಾಜಿಯವರ ಜೀವನ ಮತ್ತು ಸಾಧನೆಗಳನ್ನು ಸಾರುವ ಫೋಟೋ ಮತ್ತು ಪುಸ್ತಕ ಪ್ರದರ್ಶನವನ್ನು ರಾಷ್ಟ್ರಪತಿಗಳು ವೀಕ್ಷಿಸಿದರು.ಈ ವಿಶೇಷ ಪ್ರದರ್ಶನವು ಫೆಬ್ರವರಿ 24 ರಿಂದ ಮಾರ್ಚ್ 1, 2026 ರವರೆಗೆ ಅಮೃತ್ ಉದ್ಯಾನದಲ್ಲಿ ಸಾರ್ವಜನಿಕರ ವೀಕ್ಷಣೆಗೆ ಮುಕ್ತವಾಗಿರುತ್ತದೆ.

ಉಪರಾಷ್ಟ್ರಪತಿ ಸಿ.ಪಿ. ರಾಧಾಕೃಷ್ಣನ್, ಕೇಂದ್ರ ಸಚಿವರಾದ ಧರ್ಮೇಂದ್ರ ಪ್ರಧಾನ್, ಗಜೇಂದ್ರ ಸಿಂಗ್ ಶೇಖಾವತ್ ಮತ್ತು ರಾಜಾಜಿ ಕುಟುಂಬದ ಸದಸ್ಯರು ಉಪಸ್ಥಿತರಿದ್ದರು.
➤ರಾಜಾಜಿ ಗವರ್ನರ್ ಜನರಲ್ ಆಗಿ ಅಧಿಕಾರ ವಹಿಸಿಕೊಂಡಾಗ ತಮ್ಮ ಕೊಠಡಿಯಲ್ಲಿ ರಾಮಕೃಷ್ಣ ಪರಮಹಂಸ ಮತ್ತು ಗಾಂಧೀಜಿಯವರ ಭಾವಚಿತ್ರಗಳನ್ನು ಇರಿಸುವ ಮೂಲಕ ಭಾರತೀಯ ಆತ್ಮವನ್ನು ಎತ್ತಿ ಹಿಡಿದರು. ಆಹಾರದ ಕೊರತೆಯಿದ್ದ ಕಾಲದಲ್ಲಿ ರಾಜಾಜಿಯವರು ಸ್ವತಃ ರಾಷ್ಟ್ರಪತಿ ಭವನದ ಆವರಣದಲ್ಲಿ ನೇಗಿಲು ಹಿಡಿದು ಧಾನ್ಯಗಳನ್ನು ಬೆಳೆದು ಮಾದರಿಯಾಗಿದ್ದರು. 2047ರ ವೇಳೆಗೆ ಭಾರತವನ್ನು ಅಭಿವೃದ್ಧಿ ಹೊಂದಿದ ರಾಷ್ಟ್ರವನ್ನಾಗಿ ಮಾಡಲು ರಾಜಾಜಿಯವರ ಆದರ್ಶಗಳು ನಮಗೆ ದಾರಿದೀಪವಾಗಿವೆ. ಎಂದು ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ರಾಜಾಜಿಯವರ ಕೊಡುಗೆಗಳನ್ನು ಸ್ಮರಿಸಿದರು.
➤ "ರಾಷ್ಟ್ರಪತಿ ಭವನವು ಈಗ ಕೇವಲ ಅಧಿಕಾರದ ಕೇಂದ್ರವಾಗಿ ಉಳಿದಿಲ್ಲ, ಇದು ಭಾರತೀಯ ನಾಗರಿಕತೆಯ ಪ್ರಜಾಪ್ರಭುತ್ವದ ಆತ್ಮವಿಶ್ವಾಸದ ಪ್ರತೀಕವಾಗಿದೆ." -ಪ್ರಧಾನಿ ನರೇಂದ್ರ ಮೋದಿಸಂದೇಶದ ಮೂಲಕ ತಿಳಿಸಿದ್ದಾರೆ.
➤ ವಸಾಹತುಶಾಹಿ ಮುಕ್ತ ಭಾರತದ ಇತ್ತೀಚಿನ ಕ್ರಮಗಳು:

- ರಾಜಪಥ್ ಅನ್ನು 'ಕರ್ತವ್ಯ ಪಥ' ಎಂದು ಮರುನಾಮಕರಣ ಮಾಡಲಾಗಿದೆ.
- ರೇಸ್ ಕೋರ್ಸ್ ರಸ್ತೆಯನ್ನು 'ಲೋಕ ಕಲ್ಯಾಣ ಮಾರ್ಗ' ಎಂದು ಬದಲಾಯಿಸಲಾಗಿದೆ.
- ಇಂಡಿಯಾ ಗೇಟ್ ಬಳಿ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ಪ್ರತಿಮೆ ಸ್ಥಾಪನೆ.
- ಬ್ರಿಟಿಷ್ ಕಾಲದ ಐಪಿಸಿ (IPC) ಬದಲು 'ಭಾರತೀಯ ನ್ಯಾಯ ಸಂಹಿತೆ' ಜಾರಿ.

Take Quiz

Loading..!

ಪ್ರಚಲಿತ ಘಟನೆಗಳು