➤ ಭಾರತದ ಪ್ರಸಿದ್ಧ ಸಾರ್ವಜನಿಕ ಆರೋಗ್ಯ ತಜ್ಞ ಮತ್ತು ಲೇಖಕ ಡಾ. ಚಂದ್ರಕಾಂತ್ ಲಹರಿಯಾ ಅವರು ‘ವೈಲಿ ರಿಸರ್ಚ್ ಹೀರೋಸ್ ಪ್ರಶಸ್ತಿ 2025’ (Wiley Research Heroes Prize 2025) ಅನ್ನು ಗೆದ್ದಿದ್ದಾರೆ. ಈ ಜಾಗತಿಕ ಗೌರವಕ್ಕೆ ಪಾತ್ರರಾದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆಗೆ ಅವರು ಪಾತ್ರರಾಗಿದ್ದಾರೆ. ಡಾ. ಲಹರಿಯಾ ಅವರಿಗೆ ‘ಇಂಪ್ಯಾಕ್ಟ್ ಬಿಯಾಂಡ್ ಅಕಾಡೆಮಿಯ’ (Impact Beyond Academia) ವಿಭಾಗದಲ್ಲಿ ಈ ಪ್ರಶಸ್ತಿ ನೀಡಲಾಗಿದೆ.➤ ಶೈಕ್ಷಣಿಕ ಸಂಶೋಧನೆಗಳು ಕೇವಲ ಪ್ರಬಂಧಗಳಿಗೆ ಸೀಮಿತವಾಗದೆ, ಸಮಾಜ ಮತ್ತು ಸರ್ಕಾರಿ ನೀತಿಗಳ ಮೇಲೆ ನೈಜ ಪ್ರಭಾವ ಬೀರಬೇಕು ಎಂಬ ಉದ್ದೇಶದೊಂದಿಗೆ, ಜಾಗತಿಕವಾಗಿ 2,000ಕ್ಕೂ ಹೆಚ್ಚು ಅಭ್ಯರ್ಥಿಗಳಲ್ಲಿ ಕೇವಲ ಐವರು ಸಾಧಕರನ್ನು ಈ ಗೌರವಕ್ಕೆ ಆಯ್ಕೆ ಮಾಡಲಾಗಿದೆ.➤ ಡಾ. ಚಂದ್ರಕಾಂತ್ ಲಹರಿಯಾ ಅವರ ಸಾಧನೆಗಳು: ಡಾ. ಲಹರಿಯಾ ಅವರು ವೈದ್ಯಕೀಯ ಸಂಶೋಧನೆಯನ್ನು ಸಾಮಾನ್ಯ ಜನರ ಜೀವನ ಸುಧಾರಿಸುವ ನೀತಿಗಳಾಗಿ ಪರಿವರ್ತಿಸುವಲ್ಲಿ ಮಹತ್ವದ ಪಾತ್ರ ವಹಿಸಿದ್ದಾರೆ:=> ಆರೋಗ್ಯ ನೀತಿ ರೂಪಿಸುವಿಕೆ: ಭಾರತದ ರಾಷ್ಟ್ರೀಯ ಲಸಿಕಾ ಅಭಿಯಾನ ಮತ್ತು ಆರೋಗ್ಯ ನೀತಿಗಳನ್ನು ರೂಪಿಸುವಲ್ಲಿ ಇವರ ಕೊಡುಗೆ ಅಪಾರ.=> ಮೊಹಲ್ಲಾ ಕ್ಲಿನಿಕ್‌ಗಳು: ದೆಹಲಿಯ 'ಮೊಹಲ್ಲಾ ಕ್ಲಿನಿಕ್' ಮತ್ತು ಹೈದರಾಬಾದ್‌ನ 'ಬಸ್ತಿ ದವಾಖಾನಾ' ಮಾದರಿಗಳನ್ನು ವಿನ್ಯಾಸಗೊಳಿಸುವಲ್ಲಿ ಅವರು ಕೆಲಸ ಮಾಡಿದ್ದಾರೆ.=> ಆಯುಷ್ಮಾನ್ ಭಾರತ್: ಭಾರತದ ಮಹತ್ವಾಕಾಂಕ್ಷೆಯ 'ಆಯುಷ್ಮಾನ್ ಭಾರತ್ - ಆರೋಗ್ಯ ಮತ್ತು ಕ್ಷೇಮ ಕೇಂದ್ರಗಳ' (HWC) ಕಾರ್ಯಕ್ರಮಕ್ಕೆ ಇವರ ಸಂಶೋಧನೆಗಳು ಅಡಿಪಾಯವಾಗಿವೆ.=> ಲಸಿಕಾ ಅಭಿಯಾನ: ಭಾರತದಲ್ಲಿ ಬಾಲ್ಯದ ಲಸಿಕಾ ವ್ಯಾಪ್ತಿಯನ್ನು 2005 ರಲ್ಲಿದ್ದ ಶೇ. 55 ರಿಂದ 2023 ರ ವೇಳೆಗೆ ಸುಮಾರು ಶೇ. 94 ಕ್ಕೆ ಹೆಚ್ಚಿಸುವಲ್ಲಿ ಇವರ ಸಂಶೋಧನೆಗಳು ನೆರವಾಗಿವೆ.=> ಸಂಶೋಧನಾ ಪ್ರಬಂಧಗಳು: ಇವರು 150 ಕ್ಕೂ ಹೆಚ್ಚು ಸಂಶೋಧನಾ ಪ್ರಬಂಧಗಳನ್ನು ಪ್ರಕಟಿಸಿದ್ದು, ವಿಶ್ವದ ಅಗ್ರ ಶೇ. 2 ರಷ್ಟು ಸಂಶೋಧಕರ ಪಟ್ಟಿಯಲ್ಲಿದ್ದಾರೆ.
