International Mother Language Day

ಪ್ರಚಲಿತ ಘಟನೆಗಳು

ಫೆಬ್ರವರಿ - 21: ವಿಶ್ವ ಮಾತೃಭಾಷಾ ದಿನ

Authored by: Yallamma G Date: 21 ಫೆಬ್ರುವರಿ 2026

➤ ಪ್ರತಿವರ್ಷ ಫೆಬ್ರವರಿ 21 ರಂದು ವಿಶ್ವದಾದ್ಯಂತ 'ವಿಶ್ವ ಮಾತೃಭಾಷಾ ದಿನ'ವನ್ನು ಆಚರಿಸಲಾಗುತ್ತದೆ. ಭಾಷಾ ವೈವಿಧ್ಯತೆಯನ್ನು ಗೌರವಿಸುವುದು ಮತ್ತು ಅಳಿವಿನ ಅಂಚಿನಲ್ಲಿರುವ ಭಾಷೆಗಳನ್ನು ಸಂರಕ್ಷಿಸುವುದು ಈ ದಿನದ ಪ್ರಮುಖ ಉದ್ದೇಶವಾಗಿದೆ. ಬಾಂಗ್ಲಾದೇಶದ ಮನವಿಯ ಮೇರೆಗೆ, ಯುನೆಸ್ಕೋ 1999 ನವೆಂಬರ್ 17 ರಂದು ಫೆಬ್ರವರಿ 21ನ್ನು 'ವಿಶ್ವ ಮಾತೃಭಾಷಾ ದಿನ' ಎಂದು ಘೋಷಿಸಿತು. 2000ನೇ ಇಸವಿಯಿಂದ ಇದು ಅಧಿಕೃತವಾಗಿ ಜಾರಿಗೆ ಬಂದಿತು. ಯುನೆಸ್ಕೋ (UNESCO) ಪ್ರತಿವರ್ಷ ಒಂದು ವಿಶಿಷ್ಟ ಧ್ಯೇಯವಾಕ್ಯದೊಂದಿಗೆ ಈ ದಿನವನ್ನು ಆಚರಿಸುತ್ತದೆ.
➤ 2026ವಿಶ್ವ ಮಾತೃಭಾಷಾ ದಿನದ ಧ್ಯೇಯವಾಕ್ಯ: 'ಬಹುಭಾಷಾ ಶಿಕ್ಷಣದ ಕುರಿತು ಯುವಜನರ ಧ್ವನಿ' (Youth Voices on Multilingual Education)
➤ ವಿಶ್ವ ಮಾತೃಭಾಷಾ ದಿನದ ಹಿನ್ನೆಲೆ ಬಹಳ ಭಾವನಾತ್ಮಕವಾಗಿದೆ. ಇದರ ಉಗಮಕ್ಕೆ ಕಾರಣವಾಗಿದ್ದು ಇಂದಿನ ಬಾಂಗ್ಲಾದೇಶ (ಅಂದಿನ ಪೂರ್ವ ಪಾಕಿಸ್ತಾನ).1947ರಲ್ಲಿ ಪಾಕಿಸ್ತಾನ ವಿಭಜನೆಯಾದಾಗ ಪಶ್ಚಿಮ ಪಾಕಿಸ್ತಾನದ ಆಡಳಿತವು ಕೇವಲ 'ಉರ್ದು' ಭಾಷೆಯನ್ನು ಅಧಿಕೃತ ಭಾಷೆಯೆಂದು ಘೋಷಿಸಿತು. ಆದರೆ ಪೂರ್ವ ಪಾಕಿಸ್ತಾನದಲ್ಲಿದ್ದ (ಬಾಂಗ್ಲಾದೇಶ) ಜನರು ಬೆಂಗಾಲಿ ಭಾಷೆಯನ್ನು ಪ್ರೀತಿಸುತ್ತಿದ್ದರು.1952ರ ಫೆಬ್ರವರಿ 21ರಂದು ಬೆಂಗಾಲಿ ಭಾಷೆಗಾಗಿ ಪ್ರತಿಭಟನೆ ನಡೆಸುತ್ತಿದ್ದ ಢಾಕಾ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳ ಮೇಲೆ ಪೊಲೀಸರು ಗುಂಡು ಹಾರಿಸಿದರು. ಈ ಘಟನೆಯಲ್ಲಿ ಹಲವು ವಿದ್ಯಾರ್ಥಿಗಳು ಹುತಾತ್ಮರಾದರು.ಜನರ ತೀವ್ರ ಹೋರಾಟಕ್ಕೆ ಮಣಿದ ಪಾಕಿಸ್ತಾನ ಸರ್ಕಾರ 1956ರಲ್ಲಿ ಬೆಂಗಾಲಿಯನ್ನು ಅಧಿಕೃತ ಭಾಷೆಯಾಗಿ ಅಂಗೀಕರಿಸಿತು.
➤ ಜಗತ್ತಿನ ಸಾಂಸ್ಕೃತಿಕ ಶ್ರೀಮಂತಿಕೆಯನ್ನು ಭಾಷೆಗಳು ಪ್ರತಿಬಿಂಬಿಸುತ್ತವೆ. ಆದರೆ ಇಂದು ಅನೇಕ ಭಾಷೆಗಳು ಅಳಿವಿನ ಅಂಚಿನಲ್ಲಿವೆ.
ಜಗತ್ತಿನಲ್ಲಿರುವ ಒಟ್ಟು ಭಾಷೆಗಳು: ಸುಮಾರು 7,159
ಭಾರತದಲ್ಲಿರುವ ಪ್ರಮುಖ ಭಾಷೆಗಳು: 121
ಭಾರತದಲ್ಲಿರುವ ಇತರ ಉಪಭಾಷೆಗಳು: 1,599
ಅಳಿವಿನ ಅಂಚಿನಲ್ಲಿರುವ ಭಾಷೆಗಳು: ಶೇ. 40 ಕ್ಕಿಂತ ಹೆಚ್ಚು
➤ ಶಿಕ್ಷಣದಲ್ಲಿ ಮಾತೃಭಾಷೆಯ ಮಹತ್ವ: ಸಂಶೋಧನೆಗಳ ಪ್ರಕಾರ, ಮಗು ತನ್ನ ಪ್ರಾಥಮಿಕ ಶಿಕ್ಷಣವನ್ನು ಮಾತೃಭಾಷೆಯಲ್ಲಿ ಪಡೆದರೆ ಅದರ ಗ್ರಹಿಕಾ ಶಕ್ತಿ ಮತ್ತು ಸೃಜನಶೀಲತೆ ಹೆಚ್ಚಾಗುತ್ತದೆ.
- ಮಾತೃಭಾಷೆಯು ಒಬ್ಬ ವ್ಯಕ್ತಿಯ ಸಂಸ್ಕೃತಿ ಮತ್ತು ಮೂಲ ಬೇರನ್ನು ಪರಿಚಯಿಸುತ್ತದೆ.
- ಸಂಕೀರ್ಣ ವಿಷಯಗಳನ್ನು ಮಾತೃಭಾಷೆಯಲ್ಲಿ ವಿವರಿಸಿದಾಗ ಮಕ್ಕಳಿಗೆ ಬೇಗನೆ ಅರ್ಥವಾಗುತ್ತದೆ.
- ಮಾತೃಭಾಷೆಯಲ್ಲಿ ಬಲಿಷ್ಠವಾಗಿರುವ ಮಗುವಿಗೆ ಇತರ ಭಾಷೆಗಳನ್ನು ಕಲಿಯುವುದು ಸುಲಭವಾಗುತ್ತದೆ.
➤ ಭಾಷೆ ಎನ್ನುವುದು ಕೇವಲ ಸಂವಹನ ಸಾಧನವಲ್ಲ, ಅದು ಜ್ಞಾನದ ಕಣಜ. ನಮ್ಮ ಮಾತೃಭಾಷೆ ಕನ್ನಡವನ್ನು ಉಳಿಸಿ, ಬೆಳೆಸುವುದು ಪ್ರತಿಯೊಬ್ಬ ಕನ್ನಡಿಗನ ಕರ್ತವ್ಯ. ಈ ದಿನವು ನಮಗೆ ನಮ್ಮ ಮೂಲವನ್ನು ಮರೆಯದಂತೆ ನೆನಪಿಸುತ್ತದೆ.

Take Quiz

Loading..!

ಪ್ರಚಲಿತ ಘಟನೆಗಳು