* ಕರ್ನಾಟಕದ ಈಜುಪಟುಗಳು 78ನೇ ರಾಷ್ಟ್ರೀಯ ಸೀನಿಯರ್ ಈಜು ಚಾಂಪಿಯನ್‌ಷಿಪ್‌ನಲ್ಲಿ ಭರ್ಜರಿ ಪ್ರದರ್ಶನ ನೀಡಿದ್ದಾರೆ. ಭುವನೇಶ್ವರದಲ್ಲಿ ನಡೆಯುತ್ತಿರುವ ಈ ಕೂಟದಲ್ಲಿ ಒಲಿಂಪಿಯನ್ ಧಿನಿಧಿ ದೇಸಿಂಗು ಚಿನ್ನದ ಪದಕ ಗೆಲ್ಲುವ ಜೊತೆಗೆ ನೂತನ ರಾಷ್ಟ್ರೀಯ ದಾಖಲೆ ಸಾಧಿಸಿದರು.* ಅವರು ಮಹಿಳೆಯರ 100 ಮೀಟರ್ಸ್ ಫ್ರೀಸ್ಟೈಲ್ ವಿಭಾಗದಲ್ಲಿ 56.78 ಸೆಕೆಂಡುಗಳಲ್ಲಿ ಗುರಿ ಮುಟ್ಟಿದರು. ಇದರಿಂದ 2022ರಲ್ಲಿ ಶಿವಾಂಗಿ ಶರ್ಮಾ ಮಾಡಿದ್ದ 57.73 ಸೆಕೆಂಡಿನ ದಾಖಲೆ ಮುರಿಯಿತು. ಇದೇ ವಿಭಾಗದಲ್ಲಿ ಕರ್ನಾಟಕದ ಎಸ್. ಋತುಲಾ ಬೆಳ್ಳಿ ಪದಕ ಪಡೆದರು.* ಪುರುಷರ ವಿಭಾಗದ 200 ಮೀ ಬ್ಯಾಕ್‌ಸ್ಟ್ರೋಕ್‌ನಲ್ಲಿ ಮಹಾರಾಷ್ಟ್ರದ ರಿಷಭ್ ದಾಸ್ ಅವರು 2 ನಿಮಿಷ 00.65 ಸೆಕೆಂಡುಗಳಲ್ಲಿ ಸ್ಪರ್ಧೆ ಮುಗಿಸಿ ಕರ್ನಾಟಕದ ಶ್ರೀಹರಿ ನಟರಾಜ್ ಸಾಧಿಸಿದ್ದ ಹಳೆಯ ದಾಖಲೆ (2 ನಿಮಿಷ 02.29 ಸೆಕೆಂಡು)ಯನ್ನು ಮುರಿದರು. ಈ ವಿಭಾಗದಲ್ಲಿ ಕರ್ನಾಟಕದ ಉತ್ಕರ್ಷ್ ಸಂತೋಷ್ ಪಾಟೀಲ ಬೆಳ್ಳಿ ಪದಕ ಜಯಿಸಿದರು.* ಸ್ಪರ್ಧೆಯ ನಾಲ್ಕನೇ ದಿನ ಕರ್ನಾಟಕದ ಈಜುಪಟುಗಳು ಒಟ್ಟು 10 ಪದಕಗಳನ್ನು ತಮ್ಮ ಖಾತೆಗೆ ಸೇರಿಸಿದರು. ಇದರಲ್ಲಿ ನಾಲ್ಕು ಚಿನ್ನದ ಪದಕಗಳಿವೆ. ಈ ಸಾಧನೆಯೊಂದಿಗೆ ಕರ್ನಾಟಕವು ಒಟ್ಟು 36 ಪದಕಗಳೊಂದಿಗೆ ಚಾಂಪಿಯನ್‌ಷಿಪ್‌ನಲ್ಲಿ ಅಗ್ರಸ್ಥಾನದಲ್ಲಿದೆ.* 200 ಮೀ ಬ್ಯಾಕ್‌ಸ್ಟ್ರೋಕ್ ಮಹಿಳೆಯರ ವಿಭಾಗದಲ್ಲಿ ವಿಹಿತಾ ನಯನಾ ಲೋಕನಾಥನ್ ಚಿನ್ನ, ನೈಶಾ ಬೆಳ್ಳಿ ಪಡೆದರು. 50 ಮೀ ಬಟರ್‌ಫ್ಲೈಯಲ್ಲಿ ನೀನಾ ವೆಂಕಟೇಶ್ ಚಿನ್ನ, ಮಾನವಿ ವರ್ಮಾ ರಜತ ಪದಕ ಪಡೆದರು. 400 ಮೀ ಮೆಡ್ಲೆ ವಿಭಾಗದಲ್ಲಿ ತಾನ್ಯಾ ಷಡಕ್ಷರಿ ಕಂಚಿನ ಪದಕ ಗೆದ್ದರು.* ಈಜು ಚಾಂಪಿಯನ್‌ಷಿಪ್‌ನಲ್ಲಿ ಕರ್ನಾಟಕದ ಪ್ರಭಾವ ಮುಂದುವರಿದಿದ್ದು, ರಾಜ್ಯದ ಈಜು ಕ್ಷೇತ್ರದ ಅಭಿವೃದ್ಧಿಗೆ ಇದು ಹೊಸ ಉತ್ಸಾಹ ತುಂಬಿದೆ.
