Historic Delivery of Triplets

ಪ್ರಚಲಿತ ಘಟನೆಗಳು

ಭಾರತೀಯ ನೌಕಾಪಡೆಗೆ ಮತ್ತಷ್ಟು ಬಲ: ಏಕಕಾಲಕ್ಕೆ 3 ಅತ್ಯಾಧುನಿಕ ಯುದ್ಧನೌಕೆಗಳ ಹಸ್ತಾಂತರ!

Authored by: Akshata Halli Date: 3 ಎಪ್ರಿಲ್ 2026

➤ಭಾರತದ ರಕ್ಷಣಾ ವಲಯದಲ್ಲಿ 'ಆತ್ಮನಿರ್ಭರತೆ'ಗೆ ಮತ್ತೊಂದು ಗರಿ ಲಭಿಸಿದೆ. ಕೋಲ್ಕತಾದ ಗಾರ್ಡನ್ ರೀಚ್ ಶಿಪ್‌ಬಿಲ್ಡರ್ಸ್ ಆ್ಯಂಡ್ ಎಂಜಿನಿಯರ್ಸ್ (GRSE) ಸಂಸ್ಥೆಯು ಒಂದೇ ದಿನ ಭಾರತೀಯ ನೌಕಾಪಡೆಗೆ ಮೂರು ಅತ್ಯಾಧುನಿಕ ಯುದ್ಧನೌಕೆಗಳನ್ನು ಹಸ್ತಾಂತರಿಸುವ ಮೂಲಕ ಐತಿಹಾಸಿಕ ಸಾಧನೆ ಮಾಡಿದೆ. ಈ ಬೆಳವಣಿಗೆಯು ಹಿಂದೂ ಮಹಾಸಾಗರದಲ್ಲಿ ಭಾರತದ ಭದ್ರತಾ ಸಾಮರ್ಥ್ಯವನ್ನು ಕುರಿತು ಜಗತ್ತಿಗೆ ಬಲವಾದ ಸಂದೇಶ ರವಾನಿಸಿದೆ.
1.ಐಎನ್‌ಎಸ್ ದುನಗಿರಿ (INS Dunagiri) ಇದು ಭಾರತೀಯ ನೌಕಾಪಡೆಯ 'ಪ್ರಾಜೆಕ್ಟ್ 17A' ಅಡಿಯಲ್ಲಿ ನಿರ್ಮಿಸಲಾದ ಐದನೇ ಅತ್ಯಾಧುನಿಕ ಸ್ಟೆಲ್ತ್ ಗೈಡೆಡ್-ಮಿಸೈಲ್ ಫ್ರಿಗೇಟ್ ಆಗಿದೆ. ಸುಮಾರು 6,670 ಟನ್ ತೂಕದ ಈ ಯುದ್ಧನೌಕೆಯು ಶತ್ರುಗಳ ರಾಡಾರ್ ಕಣ್ಣಿಗೆ ಬೀಳದಂತೆ ಸಂಚರಿಸುವ ವಿಶಿಷ್ಟ 'ಸ್ಟೆಲ್ತ್' ವಿನ್ಯಾಸವನ್ನು ಹೊಂದಿದ್ದು, ಬ್ರಹ್ಮೋಸ್ ಸೂಪರ್‌ಸಾನಿಕ್ ಕ್ಷಿಪಣಿಗಳು ಮತ್ತು ಸುಧಾರಿತ ವಾಯು ರಕ್ಷಣಾ ವ್ಯವಸ್ಥೆಗಳೊಂದಿಗೆ ಸಂಪೂರ್ಣ ಸ್ವಯಂಚಾಲಿತ ಯುದ್ಧ ಸಾಮರ್ಥ್ಯವನ್ನು ಹೊಂದಿದೆ. ಸ್ವದೇಶಿ ತಂತ್ರಜ್ಞಾನದ ಮೈಲಿಗಲ್ಲಾದ ಈ ನೌಕೆಯು ಹಿಂದೂ ಮಹಾಸಾಗರದಲ್ಲಿ ಭಾರತದ ರಕ್ಷಣಾ ಶಕ್ತಿಯನ್ನು ಮತ್ತಷ್ಟು ಬಲಪಡಿಸಲಿದೆ.
2.ಐಎನ್‌ಎಸ್ ಸಂಶೋಧಕ್ (INS Sanshodhak) ಭಾರತೀಯ ನೌಕಾಪಡೆಯ 'ಸರ್ವೇ ವೆಸಲ್ ಲಾರ್ಜ್' (SVL) ಸರಣಿಯ ನಾಲ್ಕನೇ ಹಾಗೂ ಅಂತಿಮ ಸಮೀಕ್ಷಾ ನೌಕೆಯಾಗಿದ್ದು, ಶೇಕಡಾ 80ಕ್ಕಿಂತ ಹೆಚ್ಚು ಸ್ವದೇಶಿ ತಂತ್ರಜ್ಞಾನವನ್ನು ಒಳಗೊಂಡಿದೆ. ಸಮುದ್ರದ ಆಳದ ಸಮೀಕ್ಷೆ, ಕರಾವಳಿ ತೀರದ ನಕ್ಷೆ ತಯಾರಿಕೆ ಮತ್ತು ಸಾಗರದ ದತ್ತಾಂಶ ಸಂಗ್ರಹಿಸುವುದು ಇದರ ಪ್ರಮುಖ ಕಾರ್ಯಗಳಾಗಿವೆ. ಸುಧಾರಿತ ಸೋನಾರ್ ವ್ಯವಸ್ಥೆ ಹಾಗೂ ಸ್ವಯಂಚಾಲಿತ ಅಂಡರ್ ವಾಟರ್ ವಾಹನಗಳನ್ನು (AUV) ಹೊಂದಿರುವ ಈ ನೌಕೆಯು, ಹಿಂದೂ ಮಹಾಸಾಗರದಲ್ಲಿ ಭಾರತದ ರಕ್ಷಣಾ ಮತ್ತು ಸಂಶೋಧನಾ ಸಾಮರ್ಥ್ಯವನ್ನು ಹೆಚ್ಚಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.
3.ಐಎನ್‌ಎಸ್ ಅಗ್ರಯ್ (INS Agray) ಎಂಟು 'ಅರ್ನಾಲಾ-ಕ್ಲಾಸ್' ಜಲಾಂತರ್ಗಾಮಿ ನಿರೋಧಕ ಯುದ್ಧನೌಕೆಗಳ ಸರಣಿಯಲ್ಲಿ ನಾಲ್ಕನೆಯದಾಗಿದ್ದು, ಕರಾವಳಿ ತೀರದ ಆಳವಿಲ್ಲದ ನೀರಿನಲ್ಲಿ ಅಡಗಿರುವ ಶತ್ರು ಜಲಾಂತರ್ಗಾಮಿಗಳನ್ನು ಪತ್ತೆಹಚ್ಚಿ ನಾಶಪಡಿಸಲು ಇದನ್ನು ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿದೆ. ಜಲಜೇಟ್ (Waterjet) ತಂತ್ರಜ್ಞಾನದ ಮೂಲಕ ಚಲಿಸುವ ಭಾರತದ ಅತಿದೊಡ್ಡ ಯುದ್ಧನೌಕೆಗಳಲ್ಲಿ ಒಂದಾದ ಇದು, ಹಗುರವಾದ ಟಾರ್ಪಿಡೊಗಳು ಮತ್ತು ರಾಕೆಟ್ ಲಾಂಚರ್‌ಗಳಂತಹ ಅತ್ಯಾಧುನಿಕ ಆಯುಧಗಳನ್ನು ಒಳಗೊಂಡಿದೆ. ಶೇ. 80ಕ್ಕೂ ಹೆಚ್ಚು ಸ್ವದೇಶಿ ಪರಿಕರಗಳನ್ನು ಹೊಂದಿರುವ ಈ ನೌಕೆಯು ಭಾರತೀಯ ನೌಕಾಪಡೆಯ ಕರಾವಳಿ ಭದ್ರತೆಯನ್ನು ಮತ್ತಷ್ಟು ಬಲಪಡಿಸಲಿದೆ.
➤ಒಂದೇ ದಿನದಲ್ಲಿ ಮೂರು ಯುದ್ಧನೌಕೆಗಳ ಹಸ್ತಾಂತರವು ಭಾರತೀಯ ಹಡಗು ನಿರ್ಮಾಣ ಇತಿಹಾಸದಲ್ಲಿ ಸುಧೀರ್ಘ ಮೈಲಿಗಲ್ಲು. ಇದು ಕೇವಲ ರಕ್ಷಣಾ ಸಾಮರ್ಥ್ಯವನ್ನು ಹೆಚ್ಚಿಸುವುದಲ್ಲದೆ, ಜಾಗತಿಕ ಮಟ್ಟದಲ್ಲಿ ಭಾರತದ ಉತ್ಪಾದನಾ ಶಕ್ತಿಯನ್ನು ಪ್ರದರ್ಶಿಸುತ್ತದೆ.

Take Quiz

Loading..!

ಪ್ರಚಲಿತ ಘಟನೆಗಳು