FSSAI New Rule 2026

ಪ್ರಚಲಿತ ಘಟನೆಗಳು

FSSAI ಹೊಸ ನಿಯಮ 2026: ಆಹಾರ ಉದ್ಯಮಿಗಳು ಒಮ್ಮೆ ಲೈಸೆನ್ಸ್ ಪಡೆದರೆ ಸಾಕು, ಇನ್ಮುಂದೆ ಅದು ಲೈಫ್‌ಟೈಮ್ ವ್ಯಾಲಿಡ್!

Authored by: Akshata Halli Date: 14 ಮಾರ್ಚ್ 2026

➤ ಬೆಂಗಳೂರು: ದೇಶದ ಆಹಾರ ಉದ್ಯಮಿಗಳಿಗೆ ಮತ್ತು ಸಣ್ಣ ವ್ಯಾಪಾರಿಗಳಿಗೆ ಕೇಂದ್ರ ಸರ್ಕಾರವು ಬಂಪರ್ ಕೊಡುಗೆ ನೀಡಿದೆ. ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ತನ್ನ ಪರವಾನಗಿ (License) ಮತ್ತು ನೋಂದಣಿ ಪ್ರಕ್ರಿಯೆಯಲ್ಲಿ ಐತಿಹಾಸಿಕ ಬದಲಾವಣೆಗಳನ್ನು ತಂದಿದೆ. ಇನ್ನು ಮುಂದೆ ಒಮ್ಮೆ ಪರವಾನಗಿ ಪಡೆದರೆ ಅದು 'ಜೀವಿತಾವಧಿ ಮಾನ್ಯತೆ' (Perpetual Validity) ಹೊಂದಿರಲಿದ್ದು, ಪದೇ ಪದೇ ನವೀಕರಣ ಮಾಡುವ ಅವಶ್ಯಕತೆ ಇರುವುದಿಲ್ಲ. ನೀತಿ ಆಯೋಗದ ಶಿಫಾರಸಿನ ಮೇರೆಗೆ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯವು ಈ ಮಹತ್ವದ ನಿರ್ಧಾರ ಕೈಗೊಂಡಿದೆ. ಏಪ್ರಿಲ್ 1, 2026 ರಿಂದ ಈ ಹೊಸ ನಿಯಮಗಳು ಜಾರಿಗೆ ಬರಲಿವೆ.
➤ ಪ್ರಮುಖ ಬದಲಾವಣೆಗಳು:
1.ಜೀವಿತಾವಧಿ ಪರವಾನಗಿ (Perpetual Validity):ಹಿಂದೆ ಆಹಾರ ಉದ್ಯಮಿಗಳು ಪ್ರತಿ 1 ರಿಂದ 5 ವರ್ಷಕ್ಕೊಮ್ಮೆ ತಮ್ಮ ಲೈಸೆನ್ಸ್ ನವೀಕರಿಸಬೇಕಾಗಿತ್ತು. ಈಗ, ಒಮ್ಮೆ ನೋಂದಣಿ ಅಥವಾ ಪರವಾನಗಿ ಪಡೆದರೆ, ಉದ್ಯಮವು ನಿಯಮಗಳನ್ನು ಉಲ್ಲಂಘಿಸಿ ರದ್ದಾಗದ ಹೊರತು ಅದು ಕಾಯಂ ಆಗಿ ಚಾಲ್ತಿಯಲ್ಲಿರುತ್ತದೆ. ಇದರಿಂದ ಅನಗತ್ಯ ದಾಖಲೆ ಸಲ್ಲಿಕೆ ಮತ್ತು ಲಂಚದ ಹಾವಳಿ ತಪ್ಪಲಿದೆ.
2.ವಾರ್ಷಿಕ ವಹಿವಾಟು ಮಿತಿಯಲ್ಲಿ ಏರಿಕೆ (Revised Turnover Limits):ಸಣ್ಣ ವ್ಯಾಪಾರಿಗಳಿಗೆ ಅನುಕೂಲವಾಗುವಂತೆ ವಹಿವಾಟಿನ ಮಿತಿಯನ್ನು ಗಣನೀಯವಾಗಿ ಹೆಚ್ಚಿಸಲಾಗಿದೆ:
- ಮೂಲ ನೋಂದಣಿ (Basic Registration): ಈ ಮೊದಲು ₹12 ಲಕ್ಷ ಇದ್ದ ಮಿತಿಯನ್ನು ಈಗ ₹1.5 ಕೋಟಿಗೆ ಏರಿಸಲಾಗಿದೆ.
- ರಾಜ್ಯ ಪರವಾನಗಿ (State License): ₹50 ಕೋಟಿ ವರೆಗಿನ ವಹಿವಾಟು ನಡೆಸುವ ಉದ್ಯಮಗಳಿಗೆ ಅನ್ವಯ.
- ಕೇಂದ್ರ ಪರವಾನಗಿ (Central License): ₹50 ಕೋಟಿಗಿಂತ ಹೆಚ್ಚಿನ ವಹಿವಾಟು ನಡೆಸುವ ಬೃಹತ್ ಉದ್ಯಮಗಳಿಗೆ ಕಡ್ಡಾಯ.
3.ಬೀದಿ ಬದಿ ವ್ಯಾಪಾರಿಗಳಿಗೆ ಸಿಹಿ ಸುದ್ದಿ:ನಗರ ಪಾಲಿಕೆ ಅಥವಾ ಸ್ಥಳೀಯ ಸಂಸ್ಥೆಗಳಲ್ಲಿ ನೋಂದಾಯಿತರಾಗಿರುವ ಬೀದಿ ಬದಿ ವ್ಯಾಪಾರಿಗಳಿಗೆ ಈಗ 'ದ್ವಿಮುಖ ನೋಂದಣಿ'ಯ ಕಿರಿಕಿರಿ ಇರುವುದಿಲ್ಲ. ನಗರ ಪಾಲಿಕೆಯ ಗುರುತಿನ ಚೀಟಿ ಹೊಂದಿರುವವರು ಸ್ವಯಂಚಾಲಿತವಾಗಿ FSSAI ಅಡಿಯಲ್ಲಿ ನೋಂದಾಯಿತರೆಂದು ಪರಿಗಣಿಸಲ್ಪಡುತ್ತಾರೆ. ಇದರಿಂದ ಸುಮಾರು 10 ಲಕ್ಷಕ್ಕೂ ಹೆಚ್ಚು ವ್ಯಾಪಾರಿಗಳಿಗೆ ಲಾಭವಾಗಲಿದೆ.
4.ತಂತ್ರಜ್ಞಾನ ಆಧಾರಿತ ತಪಾಸಣೆ (Risk-Based Inspection):ಇನ್ನು ಮುಂದೆ ಆಹಾರ ಸುರಕ್ಷತಾ ಅಧಿಕಾರಿಗಳು ಸುಮ್ಮಸುಮ್ಮನೆ ತಪಾಸಣೆ ನಡೆಸುವಂತಿಲ್ಲ. ಆಹಾರದ ಅಪಾಯದ ಮಟ್ಟ, ಹಳೆಯ ದಾಖಲೆಗಳು ಮತ್ತು ಮೂರನೇ ವ್ಯಕ್ತಿಯ ಆಡಿಟ್ ವರದಿಗಳ ಆಧಾರದ ಮೇಲೆ ಮಾತ್ರ ತಂತ್ರಜ್ಞಾನ ಬಳಸಿ ತಪಾಸಣೆ ನಡೆಸಲಾಗುತ್ತದೆ.
➤ FSSAI : ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಕಾಯ್ದೆ 2006 ರ ಅಡಿಯಲ್ಲಿ ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದ ಅಧೀನದಲ್ಲಿ ಸ್ಥಾಪಿತವಾಗಿರುವ FSSAI (Food Safety and Standards Authority of India) ಸಂಸ್ಥೆಯು, ಆಹಾರ ಪದಾರ್ಥಗಳ ತಯಾರಿಕೆ, ಸಂಗ್ರಹಣೆ, ವಿತರಣೆ ಮತ್ತು ಮಾರಾಟದ ಮೇಲೆ ಕಟ್ಟುನಿಟ್ಟಿನ ನಿಗಾ ಇಡುವ ಮೂಲಕ ಸಾರ್ವಜನಿಕ ಆರೋಗ್ಯವನ್ನು ಕಾಯುವ ಪ್ರಮುಖ ಉದ್ದೇಶವನ್ನು ಹೊಂದಿದೆ.
➤ ಕೇಂದ್ರ ಸರ್ಕಾರದ ಈ "Ease of Doing Business" ಕ್ರಮವು ಸಣ್ಣ ಹೋಟೆಲ್ ಮಾಲೀಕರು, ಬೇಕರಿಗಳು ಮತ್ತು ಬೀದಿ ಬದಿ ವ್ಯಾಪಾರಿಗಳಿಗೆ ಆರ್ಥಿಕ ಹೊರೆ ಕಡಿಮೆ ಮಾಡಲಿದೆ. ಇದು ಕೇವಲ ವ್ಯಾಪಾರ ಸ್ನೇಹಿ ಮಾತ್ರವಲ್ಲದೆ, ಅಧಿಕಾರಿಗಳು ಕಾಗದದ ಕೆಲಸ ಬಿಟ್ಟು ಆಹಾರದ ಗುಣಮಟ್ಟದ ಮೇಲೆ ಹೆಚ್ಚು ಗಮನ ಹರಿಸಲು ಸಹಕಾರಿಯಾಗಲಿದೆ.

Take Quiz

Loading..!

ಪ್ರಚಲಿತ ಘಟನೆಗಳು