Job Description: ➤ ಬೆಂಗಳೂರು: ಭಾರತೀಯ ಟೇಬಲ್ ಟೆನಿಸ್ ಲೋಕದಲ್ಲಿ ಮತ್ತೊಂದು ಸುವರ್ಣ ಅಧ್ಯಾಯ ಬರೆಯಲ್ಪಟ್ಟಿದೆ. ಕೊಸೊವೊದ ಪ್ರಿಸ್ಟಿನಾದಲ್ಲಿ ನಡೆದ ಡಬ್ಲ್ಯುಟಿಟಿ ಪ್ರಿಸ್ಟಿನಾ ಫೀಡರ್ (WTT Pristina Feeder 2026) ಟೇಬಲ್ ಟೆನಿಸ್ ಸರಣಿಯಲ್ಲಿ ಭಾರತದ 15 ವರ್ಷದ ಉದಯೋನ್ಮುಖ ತಾರೆ ದಿವ್ಯಾಂಶಿ ಭೌಮಿಕ್ (Divyanshi Bhowmick) ಸಿಂಗಲ್ಸ್ ಮತ್ತು ಡಬಲ್ಸ್ ಎರಡರಲ್ಲೂ ಚಿನ್ನದ ಪದಕ ಮುಡಿಗೇರಿಸಿಕೊಳ್ಳುವ ಮೂಲಕ ಐತಿಹಾಸಿಕ ದಾಖಲೆ ನಿರ್ಮಿಸಿದ್ದಾರೆ.➤ ಮಹಿಳಾ ಸಿಂಗಲ್ಸ್: ದಿವ್ಯಾಂಶಿ ಭೌಮಿಕ್ ಅತಿ ಕಿರಿಯ ಚಾಂಪಿಯನ್: ವಿಶ್ವ ಕ್ರಮಾಂಕದಲ್ಲಿ 211ನೇ ಸ್ಥಾನದಲ್ಲಿದ್ದ ದಿವ್ಯಾಂಶಿ ಭೌಮಿಕ್, ಮಹಿಳಾ ಸಿಂಗಲ್ಸ್‌ನ ರೋಚಕ ಫೈನಲ್ ಪಂದ್ಯದಲ್ಲಿ ಜಗತ್ತಿನ 38ನೇ ಶ್ರೇಯಾಂಕದ ಬಲಿಷ್ಠ ಆಟಗಾರ್ತಿ, ಚೀನಾ ತೈಪೆಯ ಯೆಯಿ ತಿಯಾನ್ (Yeh Yi-Tian) ಅವರನ್ನು 3-2 ಗೇಮ್‌ಗಳ ಅಂತರದಿಂದ ಸೋಲಿಸಿ ಪ್ರಶಸ್ತಿ ಜಯಿಸಿದರು. ಸ್ಕೋರ್ ವಿವರ: 8-11, 11-8, 11-5, 7-11, 11-7 ದಾಖಲೆ: ಈ ಪ್ರಶಸ್ತಿ ಗೆಲ್ಲುವ ಮೂಲಕ ದಿವ್ಯಾಂಶಿ, ಡಬ್ಲ್ಯುಟಿಟಿ ಫೀಡರ್ ಮಹಿಳಾ ಸಿಂಗಲ್ಸ್ ಪ್ರಶಸ್ತಿ ಮುಡಿಗೇರಿಸಿಕೊಂಡ ಭಾರತದ ಅತಿ ಕಿರಿಯ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಜಾಗತಿಕ ಸಾಧನೆ: ಜಪಾನ್‌ನ ಖ್ಯಾತ ಆಟಗಾರ್ತಿ ಮಿವಾ ಹರಿಮೊಟೊ (Miwa Harimoto) ನಂತರ ಈ ಸರಣಿಯ ಸಿಂಗಲ್ಸ್ ಪ್ರಶಸ್ತಿ ಗೆದ್ದ ವಿಶ್ವದ ಎರಡನೇ ಅತಿ ಕಿರಿಯ ಆಟಗಾರ್ತಿ ದಿವ್ಯಾಂಶಿ ಆಗಿದ್ದಾರೆ. ➤ ಮಹಿಳಾ ಡಬಲ್ಸ್‌ನಲ್ಲೂ ಬಂಗಾರ: ಸಿಂಗಲ್ಸ್‌ನಲ್ಲಿ ಇತಿಹಾಸ ಬರೆದ ಬೆನ್ನಲ್ಲೇ ದಿವ್ಯಾಂಶಿ, ಮಹಿಳಾ ಡಬಲ್ಸ್‌ನಲ್ಲೂ ದೇಶದ ಮತ್ತೊಬ್ಬ ಯುವ ಪ್ರತಿಭೆ ಸಿಂಡ್ರೆಲಾ ದಾಸ್ (Syndrela Das) ಅವರೊಂದಿಗೆ ಜೊತೆಯಾಗಿ ಭಾರತಕ್ಕೆ ಎರಡನೇ ಚಿನ್ನದ ಪದಕ ತಂದುಕೊಟ್ಟರು. ಫೈನಲ್ ಪಂದ್ಯದಲ್ಲಿ ಭಾರತದ ಈ ಜೋಡಿಯು ಜಪಾನ್‌ನ ಪ್ರಬಲ ಜೋಡಿಯಾದ ಸಾಚಿ ಅಯೋಕಿ ಮತ್ತು ಕೊಕೊನಾ ಮುರಾಮತ್ತು (Sachi Aoki & Cocona Muramatsu) ಅವರನ್ನು 3-2 (7-11, 14-12, 12-14, 11-8, 11-7) ಗೇಮ್‌ಗಳಿಂದ ರೋಚಕವಾಗಿ ಸೋಲಿಸಿತು. ಸುಮಾರು 30 ನಿಮಿಷಗಳ ಕಾಲ ನಡೆದ ಈ ತೀವ್ರ ಹಣಾಹಣಿಯಲ್ಲಿ ಒತ್ತಡದ ಸಂದರ್ಭದಲ್ಲೂ ಅದ್ಭುತ ಪ್ರದರ್ಶನ ನೀಡಿದ ಭಾರತೀಯ ಜೋಡಿ ಚಿನ್ನಕ್ಕೆ ಮುತ್ತಿಕ್ಕಿತು.
