* ಅಂತರರಾಷ್ಟ್ರೀಯ ಪರ್ವತ ದಿನವನ್ನು ಪ್ರತಿ ವರ್ಷ ಡಿಸೆಂಬರ್ 11ರಂದು ಪರ್ವತಗಳ ಮಹತ್ವ ಮತ್ತು ಸುಸ್ಥಿರ ಪರ್ವತ ಅಭಿವೃದ್ಧಿಯ ಬಗ್ಗೆ ಜಾಗತಿಕ ಮಟ್ಟದಲ್ಲಿ ಜಾಗೃತಿ ಮೂಡಿಸಲು ಆಚರಿಸಲಾಗುತ್ತದೆ. 2025ರಲ್ಲಿ ಇದು ಗುರುವಾರ, ಡಿಸೆಂಬರ್ 11, 23ನೇ ವಾರ್ಷಿಕ ದಿನವಾಗಿದ್ದು, ಈ ಆಚರಣೆಯನ್ನು ವಿಶ್ವಸಂಸ್ಥೆಯ ಆಹಾರ ಮತ್ತು ಕೃಷಿ ಸಂಸ್ಥೆ (FAO) ಮುನ್ನಡೆಸುತ್ತದೆ. * ಅಂತರರಾಷ್ಟ್ರೀಯ ಪರ್ವತ  ದಿನದ 2025ರ ಥೀಮ್  “ಪರ್ವತಗಳು ಮತ್ತು ಅದರಾಚೆಗಿನ ನೀರು, ಆಹಾರ ಮತ್ತು ಜೀವನೋಪಾಯಕ್ಕೆ ಹಿಮನದಿಗಳು ಮುಖ್ಯ.”* ಅಂತರರಾಷ್ಟ್ರೀಯ ಪರ್ವತ ದಿನವನ್ನು ಆಚರಿಸುವ ಪ್ರಮುಖ ಉದ್ದೇಶ ಎಂದರೆ ಪರ್ವತಗಳು ಜಗತ್ತಿನ ಪರಿಸರ ಸಮತೋಲನ, ನೀರು–ಆಹಾರ–ಜೀವನೋಪಾಯದ ಭದ್ರತೆ ಮತ್ತು ಶತಕೋಟಿ ಜನರ ಬದುಕಿಗೆ ಎಷ್ಟು ಅವಿಭಾಜ್ಯವಾಗಿವೆ ಎಂಬುದನ್ನು ಜಾಗತಿಕ ಮಟ್ಟದಲ್ಲಿ ಒತ್ತಿ ಹೇಳುವುದು. ಈ ದಿನವು ಸುಸ್ಥಿರ ಪರ್ವತ ಅಭಿವೃದ್ಧಿ ಕುರಿತ ಜಾಗೃತಿಯನ್ನು ಹೆಚ್ಚಿಸುವುದಲ್ಲದೆ, ಪರ್ವತ ಪರಿಸರ ವ್ಯವಸ್ಥೆಗಳ ಸಂರಕ್ಷಣೆಗೆ ಜನರನ್ನು ಸಕ್ರಿಯವಾಗಿ ಭಾಗಿಯಾಗಲು ಉತ್ತೇಜಿಸುತ್ತದೆ. ಜೊತೆಗೆ, ಪರ್ವತ ಪ್ರದೇಶಗಳಲ್ಲಿ ಬಡತನ ನಿರ್ಮೂಲನೆ, ಸಂಪನ್ಮೂಲಗಳ ಸಮರ್ಪಕ ಬಳಕೆ ಮತ್ತು ಹವಾಮಾನ ಬದಲಾವಣೆ ಎದುರಿಸಲು ಅಗತ್ಯವಾದ ಜಾಗತಿಕ ಆಸಕ್ತಿ ಹಾಗೂ ಬದ್ಧತೆಯನ್ನು ವೃದ್ಧಿಸುವುದೂ ಇದರ ಇನ್ನೊಂದು ಮುಖ್ಯ ಗುರಿಯಾಗಿದೆ.*ಅಂತರರಾಷ್ಟ್ರೀಯ ಪರ್ವತ ದಿನದ ಕಲ್ಪನೆ 1992ರಲ್ಲಿ ರಿಯೋ-ಡಿಜನೆರಿಯೋದಲ್ಲಿ ನಡೆದ ಪರಿಸರ ಮತ್ತು ಅಭಿವೃದ್ಧಿ ಕುರಿತ ವಿಶ್ವಸಂಸ್ಥೆಯ ಸಮ್ಮೇಳನ (Earth Summit)  ಕಾರ್ಯಸೂಚಿ Agenda 21 – Chapter 13: “Managing Fragile Ecosystems: Sustainable Mountain Development” ನಿಂದ ಹುಟ್ಟಿಕೊಂಡಿತು. ಪರ್ವತಗಳ ಮಹತ್ವಕ್ಕೆ ವಿಶ್ವದ ಗಮನ ಹೆಚ್ಚಿದಂತೆ, 2002ನೇ ವರ್ಷವನ್ನು ಅಂತರರಾಷ್ಟ್ರೀಯ ಪರ್ವತಗಳ ವರ್ಷ ಎಂದು ಘೋಷಿಸಲಾಯಿತು. ನಂತರ, ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯು A/RES/57/245 ನಿರ್ಣಯದ ಮೂಲಕ 2003ರಿಂದ ಡಿಸೆಂಬರ್ 11 ಅನ್ನು ‘ಅಂತರರಾಷ್ಟ್ರೀಯ ಪರ್ವತ ದಿನ’ವಾಗಿಸಿ ಆಚರಿಸಲು ಘೋಷಿಸಿತು. FAO ಸಂಸ್ಥೆ ಜಾಗತಿಕ ಮಟ್ಟದಲ್ಲಿ ಈ ದಿನದ ಸಂಯೋಜಕ ಸಂಸ್ಥೆಯಾಗಿದೆ.* ಅಂತರರಾಷ್ಟ್ರೀಯ ಪರ್ವತ ದಿನವು ಪರ್ವತಗಳ ಪರಿಸರ, ಜೀವೈವಿಧ್ಯ, ಜಲ ಸಂಪನ್ಮೂಲಗಳು, ಜನಾಂಗೀಯ ಸಂಸ್ಕೃತಿ, ಮತ್ತು ಜೀವನೋಪಾಯದ ಮೇಲೆ ಇರುವ ಅಪಾರ ಪ್ರಭಾವವನ್ನು ನೆನಪಿಸುವ ಜಾಗತಿಕ ವೇದಿಕೆ. FAO ನೇತೃತ್ವದಲ್ಲಿ ನಡೆಯುತ್ತಿರುವ ಈ ಆಚರಣೆ ಜಗತ್ತಿನ ಪರ್ವತ ಪ್ರದೇಶಗಳನ್ನು ಸಂರಕ್ಷಿಸಲು, ಪುನರುಜ್ಜೀವನಗೊಳಿಸಲು ಮತ್ತು ಸುಸ್ಥಿರವಾಗಿ ಅಭಿವೃದ್ಧಿಪಡಿಸಲು ರಾಷ್ಟ್ರಗಳನ್ನು ಒಗ್ಗೂಡಿಸುತ್ತದೆ.
