* 2030-31ರೊಳಗೆ ಕೈಗಾ ಅಣು ವಿದ್ಯುತ್ ಸ್ಥಾವರದ 5 ಮತ್ತು 6ನೇ ಘಟಕಗಳು ಕಾರ್ಯಾರಂಭವಾಗಲಿದ್ದು, ದೇಶದಲ್ಲಿ ಅಣು ವಿದ್ಯುತ್ ಉತ್ಪಾದನೆ ದುಪ್ಪಟ್ಟಾಗಲಿದೆ. ಇದರಿಂದ ಕರ್ನಾಟಕದ ವಿದ್ಯುತ್ ಉತ್ಪಾದನಾ ಸಾಮರ್ಥ್ಯವೂ ಗಣನೀಯವಾಗಿ ಹೆಚ್ಚಾಗಲಿದೆ.* ಪ್ರಸ್ತುತ ಭಾರತದಲ್ಲಿ ಅಣು ವಿದ್ಯುತ್ ಸ್ಥಾವರಗಳು 8,180 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದನೆ ಸಾಮರ್ಥ್ಯ ಹೊಂದಿವೆ. ಕೈಗಾ 5, 6ನೇ ಘಟಕ ಸೇರಿ ಒಟ್ಟು 14,300 ಮೆಗಾವ್ಯಾಟ್ ಸಾಮರ್ಥ್ಯದ ಘಟಕಗಳ ನಿರ್ಮಾಣ ಪ್ರಕ್ರಿಯೆ ನಡೆಯುತ್ತಿದೆ.* 2030-31ರ ವೇಳೆಗೆ ಈ ಕಾಮಗಾರಿ ಪೂರ್ಣಗೊಂಡು, ದೇಶದ ಒಟ್ಟು ಅಣು ವಿದ್ಯುತ್ ಉತ್ಪಾದನಾ ಸಾಮರ್ಥ್ಯ 22.48 ಗಿಗಾವ್ಯಾಟ್‌ಗೆ ಹೆಚ್ಚಳವಾಗಲಿದೆ.* ಭಾರತದಲ್ಲಿ ಒಟ್ಟು ಏಳು ಅಣು ವಿದ್ಯುತ್ ಸ್ಥಾವರಗಳಿವೆ, ಅವುಗಳಲ್ಲಿ 24 ಉತ್ಪಾದನಾ ಘಟಕಗಳಿವೆ. ಇವುಗಳಿಂದ ವಾರ್ಷಿಕ ಸರಾಸರಿ 45 ಸಾವಿರ ಮಿಲಿಯನ್‌ ಯುನಿಟ್‌ ಪರಮಾಣು ವಿದ್ಯುತ್ ಉತ್ಪಾದನೆ ಆಗುತ್ತದೆ. ಹೊಸ ಘಟಕಗಳು ಹರಿಯಾಣ (3, 4) ಮತ್ತು ಮಧ್ಯಪ್ರದೇಶ (1, 2) ನಲ್ಲಿ ನಿರ್ಮಾಣದಲ್ಲಿವೆ.* ಉತ್ತರ ಕನ್ನಡದ ಕೈಗಾ ಅಣು ವಿದ್ಯುತ್ ಸ್ಥಾವರದ 5 ಮತ್ತು 6ನೇ ಘಟಕ (ತಲಾ 700 ಮೆಗಾವ್ಯಾಟ್) ನಿರ್ಮಾಣ ಗುತ್ತಿಗೆ ಮೇಘಾ ಎಂಜಿನಿಯರಿಂಗ್‌ಗೆ ವಹಿಸಲಾಗಿದೆ. 2022 ಏಪ್ರಿಲ್‌ನಲ್ಲಿ ಭೂಮಿ ಪೂಜೆ ನಡೆದಿದ್ದು, ಯಂತ್ರಗಳ ಸಾಗಾಟ ಮುಂದುವರಿದಿದೆ. ಪೂರ್ಣಗೊಂಡರೆ ಒಟ್ಟು ಸಾಮರ್ಥ್ಯ 2280 ಮೆಗಾವ್ಯಾಟ್ ಆಗಲಿದೆ.* ಭಾರತದಲ್ಲಿ ನಿರ್ಮಾಣವಾಗುತ್ತಿರುವ 14,300 ಮೆಗಾವ್ಯಾಟ್ ಅಣುಸ್ಥಾವರ ಘಟಕಗಳಲ್ಲಿ 7,300 ಮೆಗಾವ್ಯಾಟ್ ಸಾಮರ್ಥ್ಯದವು ನಿರ್ಮಾಣ ಹಂತದಲ್ಲಿದ್ದು, 7,000 ಮೆಗಾವ್ಯಾಟ್ ಘಟಕಗಳು ಪೂರ್ವ ಯೋಜನೆ ಹಂತದಲ್ಲಿವೆ. ಕೈಗಾ ಅಣುಸ್ಥಾವರವೂ ಇದರಲ್ಲಿ ಸೇರಿದೆ ಎಂದು ಕೇಂದ್ರ ಸಚಿವ ಜೀತೇಂದ್ರ ಸಿಂಗ್ ರಾಜ್ಯಸಭೆಯಲ್ಲಿ ತಿಳಿಸಿದ್ದಾರೆ.* ಕೈಗಾ ಅಣು ವಿದ್ಯುತ್ ಸ್ಥಾವರದಲ್ಲಿ ಪ್ರಸ್ತುತ 880 ಮೆಗಾವ್ಯಾಟ್ ಸಾಮರ್ಥ್ಯದ ನಾಲ್ಕು ಘಟಕಗಳಿದ್ದು, ಹೊಸ 5 ಮತ್ತು 6ನೇ ಘಟಕಗಳು ತಲಾ 700 ಮೆಗಾವ್ಯಾಟ್ ಸಾಮರ್ಥ್ಯ ಹೊಂದಿವೆ.* ಈ ಘಟಕಗಳು ಕಾರ್ಯಾರಂಭ ಮಾಡಿದರೆ, ಇದು ದಕ್ಷಿಣ ಭಾರತದ ಎರಡನೇ ಅತಿ ದೊಡ್ಡ ಅಣು ವಿದ್ಯುತ್ ಸ್ಥಾವರವಾಗಲಿದೆ. ಈ ಮೂಲಕ 789 ಕಾಯಂ ಉದ್ಯೋಗಗಳು ಸೃಷ್ಟಿಯಾಗಲಿವೆ ಎಂದು ಕೈಗಾ ಎನ್‌ಪಿಸಿಎಲ್ ತಿಳಿಸಿದೆ.
