Life is like this loading!

We've to prepare well to perform better

ADVERTISEMENT
Image not found
ADVERTISEMENT
Back
ಕರ್ನಾಟಕ ರಾಜ್ಯ ಪೊಲೀಸ್ ಕಾನ್ಸ್‌ಟೇಬಲ್‌(PC) ಹಾಗೂ ಸಬ್‌-ಇನ್ಸ್‌ಪೆಕ್ಟರ್‌(PSI) ಹುದ್ದೆಗಳಿಗೆ ತಯಾರಿ ಹೇಗೆ ನಡೆಸಬೇಕು? ಯಾವ ಪುಸ್ತಕ ಓದಬೇಕು?

Author:Savita Halli | Published on: 27 ಮಾರ್ಚ್ 2019

Image not found

ksp police constable PSI exam preparation :

ಪೊಲೀಸ್‌ ಕಾನ್ಸ್‌ಟೇಬಲ್‌ ಮತ್ತು ಪೊಲೀಸ್‌ ಸಬ್‌-ಇನ್ಸ್‌ಪೆಕ್ಟರ್‌ ಹುದ್ದೆಗೆ ಹೇಗೆ ತಯಾರಿಯನ್ನು ನಡೆಸಬೇಕು ಎಂಬುದನ್ನು ತಿಳಿಸಿ. ಈ ಪರೀಕ್ಷೆಗೆ ಸೂಕ್ತವಾದ ಪುಸ್ತಕಗಳನ್ನು ತಿಳಿಸಿ.

ಪೊಲೀಸ್‌ ಕಾನ್ಸ್‌ಟೇಬಲ್‌ ಮತ್ತು ಪೊಲೀಸ್‌ ಸಬ್‌-ಇನ್ಸ್‌ಪೆಕ್ಟರ್‌ ಹುದ್ದೆಗಳಿಗೆ ನಡೆಸುವ ಪರೀಕ್ಷೆಯಲ್ಲಿ ಸಾಮಾನ್ಯ ಜ್ಞಾನದ ವಿಷಯಗಳಿಗೆ ಹೆಚ್ಚಿನ ಒತ್ತನ್ನು ನೀಡಲಾಗಿರುತ್ತದೆ. ಕಾನ್ಸ್‌ಟೇಬಲ್‌ ಹುದ್ದೆಗೆ ನಡೆಸುವ ಪರೀಕ್ಷೆಯಲ್ಲಿ ಸಂಪೂರ್ಣವಾಗಿ ಪ್ರಶ್ನೆಗಳನ್ನು ಸಾಮಾನ್ಯ ಜ್ಞಾನ ಮತ್ತು ಮಾನಸಿಕ ಸಾಮರ್ಥ್ಯ‌ದ ಮೇಲೆ ಕೇಳಲಾಗಿರುತ್ತದೆ. ಸಬ್‌-ಇನ್ಸ್‌ ಪೆಕ್ಟರ್‌ ಹುದ್ದೆಯ ಪರೀಕ್ಷೆಯಲ್ಲಿ ಈ ವಿಷಯಗಳ ಜೊತೆಗೆ ಪ್ರಬಂಧ, ಭಾಷಾಂತರ (ಕನ್ನಡ-ಇಂಗ್ಲಿಷ್‌ ಮತ್ತು ಇಂಗ್ಲಿಷ್‌-ಕನ್ನಡ) ವಿಷಯಗಳ ಮೇಲೆ ಕೂಡ ಪ್ರಶ್ನೆಗಳಿರುತ್ತವೆ.

ಲಿಖಿತ ಪರೀಕ್ಷೆಯು ವಸ್ತುನಿಷ್ಠ ಬಹುಆಯ್ಕೆ ಮಾದರಿಯಲ್ಲಿರುತ್ತದೆ (ಪ್ರಬಂಧ ಮತ್ತು ಭಾಷಾಂತರ ಪತ್ರಿಕೆಯನ್ನು ಹೊರತುಪಡಿಸಿ). ಕಾನ್ಸ್‌ಟೇಬಲ್‌ ಹುದ್ದೆಯ ಪ್ರಶ್ನೆಗಳು 10/12ನೇ ತರಗತಿಯ ಮಟ್ಟದ್ದಾಗಿದ್ದು ಸಬ್‌-ಇನ್ಸ್‌ಪೆಕ್ಟರ್‌ ಹುದ್ದೆಯ ಪ್ರಶ್ನೆಗಳು ಪದವಿ ಮಟ್ಟದ್ದಾಗಿರುತ್ತವೆ. ಸಾಮಾನ್ಯ ಜ್ಞಾನದಲ್ಲಿ ಸಾಮಾನ್ಯ ಅಧ್ಯಯನ, ವಿಜ್ಞಾನ, ನೀತಿ ಶಿಕ್ಷಣ, ಭೂಗೋಳ, ಆಧುನಿಕ ಭಾರತದ ಇತಿಹಾಸ, ಭಾರತದ ಸ್ವಾತಂತ್ರ್ಯ ಸಂಗ್ರಾಮ, ಭಾರತದ ಸಂವಿಧಾನ, ಮೂಲಭೂತ ಹಕ್ಕುಗಳು ಮತ್ತು ನಿರ್ದೆಶಾತ್ಮಕ ತತ್ವಗಳು ಇತ್ಯಾದಿ ವಿಷಯಗಳನ್ನು ಒಳಗೊಂಡಿರುತ್ತದೆ. ಜೊತೆಗೆ ಪ್ರಚಲಿತ ವಿದ್ಯಮಾನದ ಮೇಲೆ ಕೂಡ ಪ್ರಶ್ನೆಗಳನ್ನು ನೀವು ಅಪೇಕ್ಷಿಸಬಹುದು. ಸಾಮಾನ್ಯ ಮಾನಸಿಕ ಸಾಮರ್ಥ್ಯ‌ದಲ್ಲಿ ಗಣನಾ ಕೌಶಲ್ಯ ಮತ್ತು ಪ್ರಾದೇಶಿಕ ಮನ್ನಣೆ ಕೌಶಲ್ಯಗಳು ವಿಷಯಗಳ ಮೇಲೆ ಪ್ರಶ್ನೆಗಳನ್ನು ಕೇಳಲಾಗುತ್ತದೆ.

ಪರೀಕ್ಷಾ ತಯಾರಿ:
ಈ ಪರೀಕ್ಷೆಯ ಬಹುತೇಕ ವಿಷಯಗಳಿಗಾಗಿ ನೀವು ಆಯಾ ವಿಷಯಕ್ಕೆ ಸಂಬಂಧಿಸಿದ 10ನೇ ತರಗತಿ /12ನೇ ತರಗತಿಯ ಪುಸ್ತಕಗಳನ್ನು ಓದಬೇಕು. ಎನ್‌.ಸಿ.ಇ.ಆರ್‌.ಟಿ ಅಥವಾ ಕರ್ನಾಟಕ ಸರ್ಕಾರದ ಶಿಕ್ಷಣ ಇಲಾಖೆಯು ಪ್ರಕಟಿಸುವ ಪುಸ್ತಕಗಳನ್ನು ಓದಿದರೆ ಉತ್ತಮ. ಈ ಪುಸ್ತಕಗಳಲ್ಲಿ ಪ್ರತಿಯೊಂದು ವಿಷಯವನ್ನು ಸರಳ ಹಾಗು ಸುಲಭ ಭಾಷೆಯಲ್ಲಿ ವಿವರಿಸಲಾಗಿರುತ್ತದೆ.

ಈ ಕೆಲವು ಪುಸ್ತಕಗಳು ಬಹಳ ಉಪಯುಕ್ತವಾಗಿವೆ.
ಭಾರತದ ಸಂವಿಧಾನ ಪರಿಚಯ- ಡಿ.ಡಿ.ಬಸು
ಆಧುನಿಕ ಭಾರತದ ಇತಿಹಾಸ - ಬಿಪಿನ್‌ ಚಂದ್ರ
ಮನೋರಮಾ ಇಯರ್‌ ಬುಕ್‌ -2019
ಪ್ರಪಂಚದ ಪ್ರಾದೇಶಿಕ ಭೂಗೋಳಶಾಸ್ತ್ರ- ಡಾ. ರಂಗನಾಥ
ಮಾನಸಿಕ ಸಾಮರ್ಥ್ಯ‌ ವಿಷಯಕ್ಕಾಗಿ ನೀವು ಮೆಂಟಲ್‌ ಎಬಿಲಿಟಿ-ಎ.ಎನ್‌ ಅಂಜಿನಪ್ಪ ಪುಸ್ತಕವನ್ನು ಅಭ್ಯಾಸ ಮಾಡಿ.

ಜೊತೆಗೆ ಪ್ರಚಲಿತ ವಿದ್ಯಮಾನದ ಪ್ರಶ್ನೆಗಳನ್ನು ಉತ್ತರಿಸಲು ದಿನಪತ್ರಿಕೆಗಳನ್ನು ಕಡ್ಡಾಯವಾಗಿ ಓದಬೇಕು. ಪ್ರಾದೇಶಿಕ, ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಮಟ್ಟದ ಸುದ್ದಿಗಳನ್ನು ಹೆಚ್ಚು ಗಮನಿಸಿ. ದಿನಪತ್ರಿಕೆಗಳ ಜೊತೆಗೆ ಸ್ಪರ್ಧಾತ್ಮಕ ಪರೀಕ್ಷೆಗೆ ಸಂಬಂಧಿಸಿದ ನಿಯತಕಾಲಿಕೆಗಳನ್ನು ಅಭ್ಯಾಸ ಮಾಡಿ. ಒಂದು ವರ್ಷದ ಹಿಂದಿನ ಪತ್ರಿಕೆಗಳನ್ನು ಅಭ್ಯಾಸ ಮಾಡುವುದರಿಂದ ಬಹುತೇಕ ಎಲ್ಲ ಪ್ರಚಲಿತ ವಿದ್ಯಮಾನದ ಪ್ರಶ್ನೆಗಳನ್ನು ಉತ್ತರಿಸಬಹುದು.

ಪ್ರಬಂಧ ವಿಷಯಕ್ಕಾಗಿ ನೀವು ಪ್ರಚಲಿತ ವಿದ್ಯಮಾನದ ಮೇಲೆ ಹೆಚ್ಚಿನ ಗಮನವನ್ನು ವಹಿಸಬೇಕು. ಜೊತೆಗ ಹಿಂದಿನ ವರ್ಷದ ಪ್ರಶ್ನೆಪತ್ರಿಕೆಗಳನ್ನು ಒಮ್ಮೆ ಗಮನಿಸಿ. ಯಾವ ರೀತಿಯ ವಿಷಯಗಳ ಮೇಲೆ ಪ್ರಬಂಧವನ್ನು ಕೇಳಲಾಗಿರುತ್ತದೆ ಎಂಬುದನ್ನು ಒಮ್ಮೆ ತಿಳಿದುಕೊಳ್ಳಿ. ಕೆಲವು ವಿಷಯಗಳ ಮೇಲೆ ಪ್ರಬಂಧವನ್ನು ಖುದ್ದಾಗಿ ಬರೆದು ಅಭ್ಯಾಸ ಮಾಡಿ. ಈ ರೀತಿ ಅಭ್ಯಾಸ ಮಾಡುವುದರಿಂದ ಪರೀಕ್ಷೆಯ ಸಮಯದಲ್ಲಿ ನೀವು ನಿಮ್ಮ ಪ್ರಬಂಧವನ್ನು ಉತ್ತಮವಾಗಿ ಬರೆಯಬಹುದು. ಭಾಷಾಂತರ ವಿಷಯಗಳಿಗೆ ಕೂಡ ನೀವು ಇದೇ ರೀತಿಯಾಗಿ ಅಭ್ಯಾಸ ಮಾಡಬಹುದು.

ksp police constable PSI exam preparation

References: ksp police constable PSI exam preparation