➤ ಬಾಂಗ್ಲಾದೇಶದ ರಾಜಕೀಯ ಇತಿಹಾಸದಲ್ಲಿ ಫೆಬ್ರವರಿ 12, 2026 ಒಂದು ಮಹತ್ವದ ದಿನ. 15 ವರ್ಷಗಳ ಶೇಖ್ ಹಸೀನಾ ಅವರ ಆಡಳಿತದ ಅಂತ್ಯದ ನಂತರ ನಡೆದ ಮೊದಲ ಸಾರ್ವತ್ರಿಕ ಚುನಾವಣೆಯಲ್ಲಿ ತಾರಿಕ್ ರೆಹಮಾನ್ ನೇತೃತ್ವದ ಬಾಂಗ್ಲಾದೇಶ ನ್ಯಾಷನಲಿಸ್ಟ್ ಪಾರ್ಟಿ (BNP) ಭರ್ಜರಿ ಜಯ ದಾಖಲಿಸಿದೆ.
➤ 2024ರ ವಿದ್ಯಾರ್ಥಿ ದಂಗೆ ಮತ್ತು ಶೇಖ್ ಹಸೀನಾ ಅವರ ಪದಚ್ಯುತಿಯ ನಂತರ ನಡೆದ ಬಾಂಗ್ಲಾದೇಶದ ಈ ಐತಿಹಾಸಿಕ ಚುನಾವಣೆಯಲ್ಲಿ, ಸುಮಾರು 59.44% ಮತದಾನ ದಾಖಲಾಗಿದ್ದು, ಒಟ್ಟು 300 ನೇರ ಸಂಸದೀಯ ಸ್ಥಾನಗಳ ಪೈಕಿ ತಾರಿಕ್ ರೆಹಮಾನ್ ನೇತೃತ್ವದ BNP ಮೈತ್ರಿಕೂಟವು 212 ಸ್ಥಾನಗಳನ್ನು ಗೆಲ್ಲುವ ಮೂಲಕ ಮೂರನೇ ಎರಡರಷ್ಟು ಬಹುಮತ ಸಾಧಿಸಿದರೆ, ಜಮಾತ್-ಎ-ಇಸ್ಲಾಮಿ ಮತ್ತು ಅದರ ಮಿತ್ರಪಕ್ಷಗಳು 77 ಸ್ಥಾನಗಳನ್ನು ಪಡೆದುಕೊಂಡು ಪ್ರಬಲ ವಿರೋಧ ಪಕ್ಷವಾಗಿ ಹೊರಹೊಮ್ಮಿವೆ.
➤ ತಾರಿಕ್ ರೆಹಮಾನ್: 60 ವರ್ಷದ ತಾರಿಕ್ ರೆಹಮಾನ್ 17 ವರ್ಷಗಳ ಕಾಲ ಲಂಡನ್‌ನಲ್ಲಿ ಸ್ವಯಂ-ಘೋಷಿತ ಅಜ್ಞಾತವಾಸದಲ್ಲಿದ್ದರು. ಮಾಜಿ ಪ್ರಧಾನಿ ಖಲೀದಾ ಜಿಯಾ ಮತ್ತು ಮಾಜಿ ಅಧ್ಯಕ್ಷ ಜಿಯಾವುರ್ ರೆಹಮಾನ್ ಅವರ ಪುತ್ರರಾದ ಇವರು, ಈ ಬಾರಿ ಢಾಕಾ-17 ಮತ್ತು ಬೊಗ್ರಾ-6 ಕ್ಷೇತ್ರಗಳಲ್ಲಿ ಜಯಭೇರಿ ಬಾರಿಸಿದ್ದಾರೆ. ಇವರು ಫೆಬ್ರವರಿ 14, 2026 ರಂದು ಅಧಿಕಾರ ಸ್ವೀಕರಿಸುವ ಸಾಧ್ಯತೆಯಿದೆ.
➤ ತಾರಿಕ್ ರೆಹಮಾನ್ ಅವರು ತಮ್ಮ "ಬಾಂಗ್ಲಾದೇಶ ಫಸ್ಟ್" ವಿದೇಶಾಂಗ ನೀತಿಯಡಿ ರಾಷ್ಟ್ರೀಯ ಸಾರ್ವಭೌಮತ್ವಕ್ಕೆ ಪ್ರಥಮ ಆದ್ಯತೆ ನೀಡಿದ್ದು, "ಬಾಂಗ್ಲಾದೇಶಕ್ಕೆ ಹೊರಗೆ ಸ್ನೇಹಿತರಿದ್ದಾರೆ ಹೊರತು ಯಾರೂ ಯಜಮಾನರಲ್ಲ" ಎಂಬ ದೃಢ ನಿಲುವಿನೊಂದಿಗೆ, ಭಯೋತ್ಪಾದನೆಗೆ ಶೂನ್ಯ ಸಹಿಷ್ಣುತೆ ಹಾಗೂ ತೀಸ್ತಾ ಮತ್ತು ಪದ್ಮಾ ನದಿಗಳ ನೀರು ಹಂಚಿಕೆಯಲ್ಲಿ ಭಾರತದೊಂದಿಗೆ ನ್ಯಾಯಯುತ ಪಾಲಿಗಾಗಿ ಕಟ್ಟುನಿಟ್ಟಿನ ಚರ್ಚೆ ನಡೆಸುವ ಭರವಸೆಯನ್ನು ನೀಡಿದ್ದಾರೆ.
➤ ಭಾರತವು ಬಾಂಗ್ಲಾದೇಶದೊಂದಿಗೆ 4,000 ಕಿ.ಮೀ ಗಿಂತಲೂ ಹೆಚ್ಚು ಉದ್ದದ ಗಡಿಯನ್ನು ಹಂಚಿಕೊಂಡಿರುವುದರಿಂದ, ಈ ಬದಲಾವಣೆ ಅತ್ಯಂತ ನಿರ್ಣಾಯಕವಾಗಿದೆ.ಪ್ರಧಾನಿ ನರೇಂದ್ರ ಮೋದಿ ಅವರು ಈಗಾಗಲೇ ತಾರಿಕ್ ರೆಹಮಾನ್ ಅವರಿಗೆ ಅಭಿನಂದನೆ ಸಲ್ಲಿಸಿದ್ದು, "ಎಲ್ಲರನ್ನೂ ಒಳಗೊಳ್ಳುವ ಬಾಂಗ್ಲಾದೇಶ" ನಿರ್ಮಾಣಕ್ಕೆ ಬೆಂಬಲ ಘೋಷಿಸಿದ್ದಾರೆ.