Job Description: ➤ ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದ ಆಡಳಿತ ಇತಿಹಾಸದಲ್ಲಿ ಹೊಸ ಮೈಲಿಗಲ್ಲು ಸ್ಥಾಪನೆಯಾಗಿದೆ. ಕಾಶ್ಮೀರದ ಮಹಿಳಾ ಅಧಿಕಾರಿ ಸಬಾ ಶಾಲ್ (Saba Shawl) ಅವರನ್ನು ಶ್ರೀನಗರದ ಕೇಂದ್ರ ಕಾರಾಗೃಹದ (Central Jail Srinagar) ಅಧೀಕ್ಷಕಿಯಾಗಿ (Superintendent) ನೇಮಕ ಮಾಡಲಾಗಿದೆ. ಈ ಮೂಲಕ ಈ ಉನ್ನತ ಭದ್ರತೆಯ ಕಾರಾಗೃಹವನ್ನು ಮುನ್ನಡೆಸುತ್ತಿರುವ ಮೊದಲ ಕಾಶ್ಮೀರಿ ಮಹಿಳೆ ಎಂಬ ಹೆಗ್ಗಳಿಕೆಗೆ ಅವರು ಪಾತ್ರರಾಗಿದ್ದಾರೆ. ಮಾರ್ಚ್ 2, 2026 ರಂದು ಜಮ್ಮು ಮತ್ತು ಕಾಶ್ಮೀರ ಸರ್ಕಾರವು ಹೊರಡಿಸಿದ ಆದೇಶದ (ಸಂಖ್ಯೆ 145-Home of 2026) ಅನ್ವಯ ಈ ನೇಮಕಾತಿ ನಡೆದಿದೆ. ➤ ಇವರು ಶ್ರೀನಗರದ ಪೀರ್‌ಬಾಗ್ ನಿವಾಸಿ. ಸಮಾಜಕಾರ್ಯದಲ್ಲಿ (Master’s in Social Work) ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ಸರ್ಕಾರಿ ಸೇವೆಗೆ ಸೇರುವ ಮೊದಲು ಇವರು ಸಮುದಾಯ ಅಭಿವೃದ್ಧಿ ಸಲಹೆಗಾರರಾಗಿ ಮತ್ತು 'ಇಂಡೋ ಗ್ಲೋಬಲ್ ಸೋಶಿಯಲ್ ಸರ್ವಿಸ್ ಸೊಸೈಟಿ'ಯಲ್ಲಿ ತಳಮಟ್ಟದ ಸಾಮಾಜಿಕ ಕಾರ್ಯಕರ್ತೆಯಾಗಿ ಸೇವೆ ಸಲ್ಲಿಸಿದ್ದಾರೆ.➤ 2012ರಲ್ಲಿ ಜಮ್ಮು ಮತ್ತು ಕಾಶ್ಮೀರ ಲೋಕಸೇವಾ ಆಯೋಗ (JKPSC) ನಡೆಸಿದ ಪರೀಕ್ಷೆಯಲ್ಲಿ ಸಬಾ ಶಾಲ್ ಅವರು 'ಸೂಪರಿಂಟೆಂಡೆಂಟ್ ಆಫ್ ಪೊಲೀಸ್ (ಕಾರಾಗೃಹ)' ಹುದ್ದೆಗೆ ಆಯ್ಕೆಯಾದರು. ಅಂದು ಮುಕ್ತ ವರ್ಗದಲ್ಲಿ (Open Merit) ಲಭ್ಯವಿದ್ದ ಏಕೈಕ ಹುದ್ದೆಯನ್ನು ಇವರು ಅಲಂಕರಿಸುವ ಮೂಲಕ ಇತಿಹಾಸ ಬರೆದಿದ್ದರು. ಆ ಸಮಯದಲ್ಲಿ ಸಮವಸ್ತ್ರಧಾರಿ ಸೇವೆಗಳಿಗೆ (Uniformed Services) ಮಹಿಳೆಯರು ಸೇರುವುದು ಬಹಳ ವಿರಳವಾಗಿತ್ತು.➤ ಶ್ರೀನಗರ ಕೇಂದ್ರ ಕಾರಾಗೃಹದ ಜವಾಬ್ದಾರಿ ವಹಿಸಿಕೊಳ್ಳುವ ಮೊದಲು ಸಬಾ ಶಾಲ್ ಅವರು ಜಮ್ಮು ಮತ್ತು ಕಾಶ್ಮೀರ ಕಾರಾಗೃಹ ಇಲಾಖೆಯ ಮಹಾನಿರ್ದೇಶಕರಿಗೆ ಸಿಬ್ಬಂದಿ ಅಧಿಕಾರಿಯಾಗಿ, ಕೊತ್-ಬಲ್ವಾಲ್ ಮತ್ತು ಕುಪ್ವಾರ ಜೈಲುಗಳಲ್ಲಿ ಆಡಳಿತಾಧಿಕಾರಿಯಾಗಿ ಹಾಗೂ ಇಲಾಖೆಯ ಸಾರ್ವಜನಿಕ ಸಂಪರ್ಕ ಅಧಿಕಾರಿಯಾಗಿ (PRO) ಕಾರ್ಯನಿರ್ವಹಿಸಿದ ವ್ಯಾಪಕ ಅನುಭವ ಹೊಂದಿದ್ದಾರೆ.➤ ಇತ್ತೀಚಿನ ವರ್ಷಗಳಲ್ಲಿ ಸಮವಸ್ತ್ರಧಾರಿ ಸೇವೆಗಳಲ್ಲಿ (Police and Prisons) ಮಹಿಳೆಯರ ಪ್ರಾತಿನಿಧ್ಯ ಹೆಚ್ಚಾಗುತ್ತಿರುವುದಕ್ಕೆ ಇದು ಉತ್ತಮ ಉದಾಹರಣೆಯಾಗಿದೆ.
