Job Description: ➤ ಭಾರತೀಯ ರಕ್ಷಣಾ ಉತ್ಪಾದನಾ ವಲಯದಲ್ಲಿ ಐತಿಹಾಸಿಕ ಮೈಲಿಗಲ್ಲೊಂದು ಸ್ಥಾಪನೆಯಾಗುತ್ತಿದ್ದು, ದೇಶೀಯವಾಗಿ ಖಾಸಗಿ ವಲಯದಲ್ಲಿ ತಯಾರಾದ ಮೊದಲ C295 ರಕ್ಷಣಾ ಸಾರಿಗೆ ವಿಮಾನವು ಸೆಪ್ಟೆಂಬರ್ 22-23ರ ಸುಮಾರಿಗೆ ಗುಜರಾತ್‌ನ ವಡೋದರಾದಲ್ಲಿ ಭಾರತೀಯ ವಾಯುಪಡೆಗೆ (IAF) ಅಧಿಕೃತವಾಗಿ ಹಸ್ತಾಂತರವಾಗಲಿದೆ. ಜೂನ್ 2026 ರಲ್ಲಿ ಈ ವಿಮಾನವು ತನ್ನ ಮೊದಲ ಯಶಸ್ವಿ ಪ್ರಾಯೋಗಿಕ ಹಾರಾಟವನ್ನು ಪೂರ್ಣಗೊಳಿಸಿದ್ದು, ಇದೀಗ ಅಂತಿಮ ಹಂತದ ಪರೀಕ್ಷೆಯಲ್ಲಿದೆ. ➤ ಒಪ್ಪಂದದ ವಿವರ: ಸೆಪ್ಟೆಂಬರ್ 2021 ರಲ್ಲಿ ಭಾರತ ರಕ್ಷಣಾ ಸಚಿವಾಲಯವು ಏರ್‌ಬಸ್ (Airbus Defence and Space) ಸಂಸ್ಥೆಯೊಂದಿಗೆ ₹21,935 ಕೋಟಿ ವೆಚ್ಚದಲ್ಲಿ ಒಟ್ಟು 56 ವಿಮಾನಗಳ ಖರೀದಿಗಾಗಿ ಐತಿಹಾಸಿಕ ಒಪ್ಪಂದ ಮಾಡಿಕೊಂಡಿತ್ತು. ಭಾಗಿತ್ವ: ಈ ಯೋಜನೆಯನ್ನು ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್ ಲಿಮಿಟೆಡ್ (TASL) ಮತ್ತು ಏರ್‌ಬಸ್ ಜಂಟಿಯಾಗಿ ಅನುಷ್ಠಾನಗೊಳಿಸುತ್ತಿವೆ. ಗುಜರಾತ್‌ನ ವಡೋದರಾದಲ್ಲಿರುವ 'ಟಾಟಾ ಏರ್‌ಕ್ರಾಫ್ಟ್ ಕಾಂಪ್ಲೆಕ್ಸ್' ದೇಶದ ಮೊದಲ ಖಾಸಗಿ ವಲಯದ ಮಿಲಿಟರಿ ವಿಮಾನ ಜೋಡಣಾ ಘಟಕವಾಗಿದೆ (Final Assembly Line - FAL). ➤ ವಿಮಾನಗಳ ವಿತರಣಾ ಸೂತ್ರ (16 + 40): ಒಪ್ಪಂದದ ಪ್ರಕಾರ 16 ವಿಮಾನಗಳನ್ನು ಸ್ಪೇನ್‌ನ ಸೆವಿಲ್ಲೆ ನಗರದಿಂದ ನೇರವಾಗಿ ಹಾರಾಟದ ಸ್ಥಿತಿಯಲ್ಲಿ (Fly-away condition) ಭಾರತಕ್ಕೆ ತರಲಾಗುತ್ತದೆ. ಇನ್ನುಳಿದ 40 ವಿಮಾನಗಳನ್ನು ‘ಮೇಡ್ ಇನ್ ಇಂಡಿಯಾ’ ಯೋಜನೆಯಡಿ ಸಂಪೂರ್ಣವಾಗಿ ಭಾರತದಲ್ಲೇ (ವಡೋದರಾ ಘಟಕದಲ್ಲಿ) ತಯಾರಿಸಿ ಜೋಡಿಸಲಾಗುತ್ತದೆ. ಇವುಗಳು 2026 ರಿಂದ 2031 ರ ಒಳಗೆ ಪೂರ್ಣ ಪ್ರಮಾಣದಲ್ಲಿ ವಿತರಣೆಯಾಗಲಿವೆ. ➤ ಯಾವ ವಿಮಾನಗಳ ಬದಲಿಗೆ ಸೇರ್ಪಡೆ?: ವಾಯುಪಡೆಯಲ್ಲಿ ದಶಕಗಳ ಕಾಲ ಸೇವೆ ಸಲ್ಲಿಸಿ ಸದ್ಯ ಹಳೆಯದಾಗಿರುವ ಆವ್ರೋ-೭೪೮ (Avro HS 748) ಸಾರಿಗೆ ವಿಮಾನಗಳ ಜಾಗವನ್ನು ಈ ಅತ್ಯಾಧುನಿಕ C295 ವಿಮಾನಗಳು ತುಂಬಲಿವೆ. ➤ C295 ವಿಮಾನದ ತಾಂತ್ರಿಕ ವೈಶಿಷ್ಟ್ಯಗಳು: ಎಂಜಿನ್ ಸಾಮರ್ಥ್ಯ: ಇದು ಎರಡು ಪ್ರ್ಯಾಟ್ ಆಂಡ್ ವಿಟ್ನಿ (Pratt & Whitney PW127G) ಟರ್ಬೋಪ್ರೊಪ್ ಎಂಜಿನ್‌ಗಳನ್ನು ಹೊಂದಿದೆ. ಸಾಗಿಸುವ ಸಾಮರ್ಥ್ಯ: ಒಟ್ಟು 9.5 ಟನ್ ತೂಕದ ಸರಕು ಅಥವಾ 71 ಸೈನಿಕರು ಅಥವಾ 45 ಪ್ಯಾರಾಟ್ರೂಪರ್‌ಗಳನ್ನು ಹೊತ್ತೊಯ್ಯಬಲ್ಲದು. ಗರಿಷ್ಠ ವೇಗ: ಗಂಟೆಗೆ ಸುಮಾರು 480 ಕಿಲೋಮೀಟರ್ ವೇಗದಲ್ಲಿ ಚಲಿಸುತ್ತದೆ. ವಿಶೇಷತೆ: ಅತ್ಯಂತ ಚಿಕ್ಕದಾದ ಹಾಗೂ ಕಚ್ಚಾ ರನ್‌ವೇಗಳಲ್ಲಿ (ಅಭಿವೃದ್ಧಿಪಡಿಸದ ಮರಳು, ಹುಲ್ಲುಗಾವಲು) ಸಹ ಸುಲಭವಾಗಿ ಇಳಿಯುವ ಮತ್ತು ಟೇಕ್-ಆಫ್ ಆಗುವ ಸಾಮರ್ಥ್ಯ ಹೊಂದಿದೆ. ಇದು ಚೀನಾ ಗಡಿ ಭಾಗಗಳಲ್ಲಿ ಕಾರ್ಯಾಚರಣೆಗೆ ಹೆಚ್ಚು ಸೂಕ್ತವಾಗಿದೆ. ➤ ಈ ಯೋಜನೆಯಡಿ ಬಳಸಲಾಗುವ ಎಲೆಕ್ಟ್ರಾನಿಕ್ ವಾರ್ಫೇರ್ ಸೂಟ್ (Electronic Warfare Suite) ಅನ್ನು ಭಾರತದ ಸಾರ್ವಜನಿಕ ವಲಯದ ಸಂಸ್ಥೆಗಳಾದ ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್ (BEL) ಮತ್ತು ಭಾರತ್ ಡೈನಾಮಿಕ್ಸ್ ಲಿಮಿಟೆಡ್ (BDL) ದೇಶೀಯವಾಗಿಯೇ ತಯಾರಿಸಿಕೊಡುತ್ತಿವೆ. ಎಲ್ಲಾ 56 ವಿಮಾನಗಳ ವಿತರಣೆ ಮುಗಿದ ಬಳಿಕ ಭಾರತವು ಜಗತ್ತಿನಲ್ಲೇ C295 ವಿಮಾನಗಳ ಅತಿ ದೊಡ್ಡ ಬಳಕೆದಾರ ದೇಶ ಎನಿಸಿಕೊಳ್ಳಲಿದೆ.ಪ್ರಚಲಿತ ಘಟನೆಗಳ ಆಧಾರಿತ ಪ್ರತಿದಿನದ ಹಾಗೂ ವಾರಾಂತ್ಯದ ಕ್ವಿಜ್ ನಲ್ಲಿ ಭಾಗವಹಿಸಲು ಇಲ್ಲಿ ಕ್ಲಿಕ್ ಮಾಡಿ
