current-affairs

ಪ್ರಚಲಿತ ಘಟನೆಗಳು

ಏಷ್ಯಾ ಉತ್ಪಾದನಾ ಸೂಚ್ಯಂಕ 2026: ಭಾರತಕ್ಕೆ 6ನೇ ಸ್ಥಾನ

Authored by: Akshata Halli Date: 30 ಜನವರಿ 2026

➤ ಜಾಗತಿಕ ಆರ್ಥಿಕ ಶಕ್ತಿಯಾಗಿ ಹೊರಹೊಮ್ಮುತ್ತಿರುವ ಭಾರತವು ಉತ್ಪಾದನಾ ವಲಯದಲ್ಲಿ ಸ್ಥಿರವಾದ ಪ್ರಗತಿ ಸಾಧಿಸುತ್ತಿದೆ. ಇತ್ತೀಚೆಗೆ ಹಾಂಗ್‌ಕಾಂಗ್ ಮೂಲದ ಹೂಡಿಕೆ ಸಲಹಾ ಸಂಸ್ಥೆ 'ಡೆಜಾನ್ ಶೀರಾ ಅಂಡ್ ಅಸೋಸಿಯೇಟ್ಸ್' ಬಿಡುಗಡೆ ಮಾಡಿದ 'ಏಷ್ಯಾ ಉತ್ಪಾದನಾ ಸೂಚ್ಯಂಕ (AMI)-2026' ವರದಿಯಲ್ಲಿ ಭಾರತವು ಏಷ್ಯಾದ 11 ಪ್ರಮುಖ ಆರ್ಥಿಕತೆಗಳ ಪೈಕಿ 6ನೇ ಸ್ಥಾನವನ್ನು ಉಳಿಸಿಕೊಂಡಿದೆ.
➤ ಈ ಸೂಚ್ಯಂಕವು ಏಷ್ಯಾದ ದೇಶಗಳಲ್ಲಿ ಉತ್ಪಾದನಾ ಸೌಲಭ್ಯಗಳು ಎಷ್ಟು ಸ್ಪರ್ಧಾತ್ಮಕವಾಗಿವೆ ಎಂಬುದನ್ನು ಐದು ಪ್ರಮುಖ ಮಾನದಂಡಗಳ ಆಧಾರದ ಮೇಲೆ ಅಳೆಯುತ್ತದೆ. ಅವುಗಳೆಂದರೆ: ಮೂಲಸೌಕರ್ಯ (Infrastructure),ಕಾರ್ಮಿಕ ಶಕ್ತಿ (Labor Force),ಮಾರುಕಟ್ಟೆ ಪ್ರವೇಶ (Market Access),ನಿಯಂತ್ರಕ ವಾತಾವರಣ (Regulatory Environment),ಪೂರೈಕೆ ಸರಪಳಿಯ ಸ್ಥಿತಿಸ್ಥಾಪಕತ್ವ (Supply Chain Resilience)
➤ 'ಏಷ್ಯಾ ಉತ್ಪಾದನಾ ಸೂಚ್ಯಂಕ (AMI)-2026'
1. ಚೀನಾ: ಸತತ ಮೂರನೇ ವರ್ಷವೂ ಪ್ರಥಮ ಸ್ಥಾನದಲ್ಲಿದೆ.
2. ಮಲೇಷ್ಯಾ: ಗಮನಾರ್ಹ ಸುಧಾರಣೆ ಕಂಡು ಎರಡನೇ ಸ್ಥಾನಕ್ಕೇರಿದೆ.
3. ವಿಯೆಟ್ನಾಂ: ಕಳೆದ ವರ್ಷಕ್ಕಿಂತ ಒಂದು ಸ್ಥಾನ ಕುಸಿದು ಮೂರನೇ ಸ್ಥಾನದಲ್ಲಿದೆ.
4 and 5 . ಸಿಂಗಾಪುರ ಮತ್ತು ದಕ್ಷಿಣ ಕೊರಿಯಾ: ಕ್ರಮವಾಗಿ 4 ಮತ್ತು 5ನೇ ಸ್ಥಾನದಲ್ಲಿವೆ.
6. ಭಾರತ: ತನ್ನ 6ನೇ ಸ್ಥಾನವನ್ನು ಕಾಯ್ದುಕೊಂಡಿದೆ.
➤ ಭಾರತವು ಜಾಗತಿಕ ಉತ್ಪಾದನಾ ಹಬ್ ಆಗುವ ಹಾದಿಯಲ್ಲಿ ಪ್ರಬಲವಾದ ಸಕಾರಾತ್ಮಕ ಅಂಶಗಳನ್ನು ಹೊಂದಿದೆ. ದೇಶದ ಬೃಹತ್ ಮತ್ತು ಯುವ ಜನಸಂಖ್ಯೆಯು ವಿಶಾಲವಾದ ಕಾರ್ಮಿಕ ಶಕ್ತಿಯನ್ನು ಒದಗಿಸುವುದಲ್ಲದೆ, ದೊಡ್ಡ ಮಟ್ಟದ ಆಂತರಿಕ ಮಾರುಕಟ್ಟೆಯನ್ನೂ ಸೃಷ್ಟಿಸಿದೆ. ಸರ್ಕಾರದ 'ಮೇಕ್ ಇನ್ ಇಂಡಿಯಾ' ಮತ್ತು 'ಪಿಎಲ್‌ಐ' (PLI) ಯೋಜನೆಗಳು ಕೈಗಾರಿಕಾ ಬೆಳವಣಿಗೆಗೆ ವೇಗ ನೀಡುತ್ತಿದ್ದು, ದೇಶದ ಬಲವಾದ ಆರ್ಥಿಕ ಅಡಿಪಾಯವು ಹೂಡಿಕೆದಾರರಲ್ಲಿ ಭರವಸೆ ಮೂಡಿಸಿದೆ.
➤ ಆದಾಗ್ಯೂ, ಭಾರತವು ಕೆಲವು ಪ್ರಮುಖ ಸವಾಲುಗಳನ್ನು ಎದುರಿಸುತ್ತಿದೆ. ಮುಖ್ಯವಾಗಿ, ಲಾಜಿಸ್ಟಿಕ್ಸ್ ವೆಚ್ಚ ಹೆಚ್ಚಿರುವುದು ಮತ್ತು ತೆರಿಗೆ ನೀತಿಗಳಲ್ಲಿನ ಸಂಕೀರ್ಣತೆ (ಉನ್ನತ ಕಾರ್ಪೊರೇಟ್ ತೆರಿಗೆ) ಅಂತರಾಷ್ಟ್ರೀಯ ಸ್ಪರ್ಧೆಯಲ್ಲಿ ಹಿನ್ನಡೆ ಉಂಟುಮಾಡುತ್ತಿವೆ. ಇದರೊಂದಿಗೆ ಭೂ ಸುಧಾರಣೆ, ಕಾರ್ಮಿಕ ಕಾನೂನುಗಳ ಸಂಕೀರ್ಣತೆ ಮತ್ತು ಇತರ ದೇಶಗಳೊಂದಿಗೆ ಮುಕ್ತ ವ್ಯಾಪಾರ ಒಪ್ಪಂದಗಳ (FTA) ಕೊರತೆಯು ಭಾರತದ ಉತ್ಪಾದನಾ ಸಾಮರ್ಥ್ಯದ ಪೂರ್ಣ ಬಳಕೆಗೆ ತಡೆಯೊಡ್ಡುತ್ತಿವೆ.
➤ ಪ್ರಸ್ತುತ ಭಾರತದ ಜಿಡಿಪಿಯಲ್ಲಿ ಉತ್ಪಾದನಾ ವಲಯದ ಪಾಲು ಶೇ. 16-17 ರಷ್ಟಿದೆ. 2047ರ ವೇಳೆಗೆ 'ವಿಕಸಿತ ಭಾರತ' ನಿರ್ಮಾಣವಾಗಬೇಕಾದರೆ, ಭಾರತವು ಏಷ್ಯಾದ 'ಉತ್ಪಾದನಾ ಇಂಜಿನ್' ಆಗಿ ಬದಲಾಗಬೇಕಿದೆ. ಇದಕ್ಕಾಗಿ ಕೈಗಾರಿಕಾ ಕ್ಲಸ್ಟರ್‌ಗಳನ್ನು ಬಲಪಡಿಸುವುದು ಮತ್ತು ವ್ಯಾಪಾರ ಮಾಡುವಿಕೆಯನ್ನು (Ease of Doing Business) ಮತ್ತಷ್ಟು ಸರಳೀಕರಿಸುವುದು ತುರ್ತು ಅಗತ್ಯವಾಗಿದೆ.

Take Quiz

Loading..!

ಪ್ರಚಲಿತ ಘಟನೆಗಳು